Ki samla pule ka skulbah NEHU kin ym weng satia ia ka jingshah thngan jong ki katba kim pat ioh ïa ki mat dawa kynthup ïa ka jingdawa hiar shuki ia u Vice Chancellor (VC) u Prof PS Shukla. Ka jingshong shah thngan ki samla pule jong ka skulbah NEHU ka la jam 8 sngi haduh mynta ka sngi Ba-ar bad 12 ngut ki samla pule ki la poi sha hospital hadien ba ki kem tlot ha ka met. “Na ki 12 ngut ki samla pule ba la shah pynkit sha Hospital, 2 ngut na ki dang don hapoh ka jingsumar ha Hospital” la ong uwei na ki samla pule uba dang shu wan phai na Hospital. Hadien ba mih na Hospital, baroh 10 ngut ki la leit phai biang sha ka jaka shah thngan ha phyllaw ka Administrative Block ban bteng ia ka jingiakhih jong ki lem bad kiwei ki para samla pule.
Haduh mynta ka jingshah thngan khlem pud sngi bad ka jingkhang khyrdep ia ka skulbah NEHU ka dang ïai bteng kaba la pynlong ïa ki klas ban sangeh noh ha kane ka skulbah. Haba kren sha ki lad pathai khubor, u President ka KSU-NEHU, u Sandy Sohtun ula ong ba baroh ki samla pule ka NEHU bad ki samla pule na ki jaka pule bapher bapher na Meghalaya bad shabar ka Jylla ki la ai ka jingkyrshan ia ka jingiakhih ki samla pule NEHU kaba dang bteng haduh mynta. “Wat hadien 8 sngi ka jingshah thngan, ngi dang skhem beit ha ka jingdawa ba u Vice Chancellor (VC) u dei ban hiar shuki noh bad u dei ruh ban weng kam noh ia u Registrar, u Deputy Registrar bad ia ki Ophisar kiba don ha ka kam kyrpang (OSD)” la ong u samla Sandy.
U samla Sandy ula pyntip ba ka NEHUTA bad ka MeTTA lem bad ka NEHUSU ki la thoh da ka shithi sha ka President ka ri India bad sha u Myntri ka Sorkar Pdeng ka tnad pule ha ka 11 tarik Nailur, ban pan jingïarap halor ki jingeh ba la jia ha NEHU. U la pyntip ba ka NEHUTA bad ka MeTTA ki la kynduh ia u Lat ka jylla u CH Vijayashankar ha ka 12 tarik Naiwieng.”Watla ngim shym la ioh ka jingkhot na u Lat hynrei ngi khmih lynti ba shen, u Lat un khot ia ngi ban iakren halor ka kynrum kynram kaba dang iai bteng mynta ha NEHU” u la bynrap.
