Pra phom ka UDP Ri Bhoi, ki dak nangtroin ha ka ilekshon MP

Ha shwa ba ka jylla Meghalaya kan shim bynta ha ka ilekshon jong ka Lok Sabha ha ka Shillong Parliamentary Seat bad ka Tura Parliamentary Seat, ka kynhun jong ka United Democratic Party (UDP) ka la mad ia ka jingjakhom khait hadien ba ki nongialam ba hakhmat eh jong kane ka party ha Ri Bhoi District ki la rai ban mih noh na ka party bad ban pynkut ia ka jingiadei bad kane ka party riewlum ba la rim tam hapoh ka jylla.Ha ka jingkren u Bah Donbok Khymdeit, President Rangbah ka UDP Ri Bhoi District Unit, ula pyntip paidbah ba ki nongialam ba hakhmat eh jong ka UDP Ri Bhoi District Unit kynthup ma u lem bad katto katne ngut ki nongialam ka Central Body, Youth Wing bad ka Women Wing ki la rai ban mih noh na ka UDP naduh ka 20 tarik u Lber 2024.

U la iathuh ruh, ba ki nongialam ba hakhmat eh jong ka UDP Ri Bhoi District ki la ia soi ban mih noh na kane ka party ha kaba la bynrap ruh ba ka daw ba ki la mih kam don kano kano ka daw pyrshah ia ka UDP Ri Bhoi District ne ka State hynrei kane ka jingmih jong ki nongialam ka long halor ka daw shimet shimet. “Kane ka kam bad ka rai kam dei ka rai khyllung khynnah hynrei ka dei hi ka dei hi ka rai rangbah kumta ngi pyntip paidbah ba ma ngi ki nongialam bad ki dkhot ka UDP Ri Bhoi District kynthup lang ki nongialam ka Youth Wing bad Women Wing”, ong u Bah Donbok Khymdeit.

Ki nongialam ba hakhmat eh kiba la rai ban mih noh na ka UDP Ri Bhoi District ki kynthup naduh u Bah Donbok Khymdeit – Working President UDP State, President UDP Ri Bhoi District, Bah Raphael Massar- Chief Adviser UDP Ri Bhoi District, Bah Rangkynsai R Makdoh – Adviser UDP Ri Bhoi District, Kong Queen Mary Rymbai – Joint Secretary UDP Women’s Wing State, Bah Biolkingstar Tmung – Auditor UDP Ri Bhoi District, Bah Watson Kharkrang – President UDP YW Umsning Circle, Bah Jeffrey Khymdeit – Joint Secretary UDP YW State, Bah Prosper Dorphang – Secretary UDP YW Ri Bhoi District, Bah Rajes Lapang – Working President UDP YW, Ri Bhoi District, Bah Richard Moksha – Vice President UDP YW, Ri Bhoi District, Bah Kitdorius Dkhar – Vice President UDP YW Ri Bhoi District, Bah Johny Marbaniang – Finance Secretary UDP YW Ri Bhoi District, Bah Pril Sten – Sports Secretary UDP YW Ri Bhoi District, Bah Moonstar Jarain – Asst Secretary Sports Secretary UDP YW Ri Bhoi District bad kiwei ki dkhot.