Premiere League : Ïakhaid ka Tottenham bad ka Everton

Ka jingialehkai English Premiere League hapdeng ka Tottenham bad ka Everton ka la kut ha ka jingiakhaid da 2-2 ha Goodison Park hynne ka sngi.
U Richarlison ka Tottenham u la ioh ban pynkhih jar nyngkong ha ka minit kaba 4, ka Everton ruh ka la iakhun tyngeh bad ha ka minit kaba 30 ka la ioh ban pyniakhaid da 1-1 lyngba u Jack Harrison, hynrei shuwa ban kut ka kyllastep u Richarlison u la ioh ban pyntam da 2-1 ha ka minit kaba 41.
Haba wanphai ha ka kyllamiet, ha ka por ba la sakhi kumba ki lai poin kin leit sha ka Tottenham ka Everton ka la ioh ban pyniakhaid noh pynban da 2-2 lyngba u Jarrad Branthwaite ha ka minit kaba 90+4, kaba ki la hap ban ia sam noh mar shi poin.
Ka Tottenham ka la ioh khur 44 poin na 23 sien ialehkai bad ka don ha ka kyrdan basaw tad haduh mynta, katba ka Everton ka la ioh khur 19 na 23 sien ialehkai bad don ha ka kyrdan ba 18 ha ka miej iakhein poin Premiere league.