Namar ka jingsyrtok ban iaid ban ieng ia ka surok rong ba la shah pynpra na ka daw ka jingpynheh ïa ka madan ïalehkai ha ka Shnong Pahambir Them, mynta ka sngi ka 02 tarik Naitung, ki paidbah nongshong Shnong Maïong Nonglyngdoh ki la mih paidbah ban leit tur sha ophis ka PWD Nongpoh ban pynsngew ïa ka jingeh jong ki halor ka leit ka wan kaba la ktah ia ki paidbah.
Kum ban shu pynpaw hangne, katei ka surok rong ba ki paidbah jong ka Shnong Mawïong Nonglyngdoh bad ka Shnong Pahamshiken kiba pyndokam ban ïaid ban ïeng dei ba dang bha hynrei na ka daw ka jingpynheh ïa ka madan ïalehkai kaba don ha ka Shnong Pahambir Them ka la ktah pynban kumba 80 meter eiei ïa ka bynta jong katei ka surok haduh ba ki Paidbah kiba pyndonkam khamtam ki khynnah skul ki la hap ban mad ïa ka jingeh khamtam ha kane ka aïom slap kaba la pynlong ban dap da ka ktieh suda haduh ba ki kali kim lah shuh ban ïaid lyngba utei u surok.
Ha katei ka jingleit mih da ki paidbah ka Maïong Nonglyngdoh sha ophis PWD Nongpoh, na ka liang u SDO ula ong na ka liang u Contractor ula pyrshang ban pynhap ïa ki maw ban pynbha ïa utei u surok, hynrei namar ki daw jong ka jingjur u slap ka la pynlong ïa katei ka surok ban dap da ka ktieh.
Shuh shuh ha ka jingkren u SDO sha ki paidbah, ula ïathuh ba ïa katei ka surok ka la don ka jingpynmang ban shna pynbha ïa katei ka bynta ha ka jingrben ba shi phut. U la kular ruh ba un sa bthah ïa u contractor ba dei peit ban pynbha mardor da ka ba siang shwa da ki maw bad ïa ka jingsiang rong hadien ba kut ka aïom slap.
Haba kren sha ki nongthoh khubor hadien ka jingïakynduh, u Rangbah Shnong Ka Shnong Mawïong u bah Mathius Maring u la ïathuh, kane ka jingwan daki paidbah ka long ban pynsngew ïaki jingeh halor ka leit ka wan kaba ki nongshong Shnong ki la mat mynta la bun bun bnai. Khamtam ha kane ka por slap ka jingdap daka ktieh ha katei ka bynta jong u surok ka pyn syrtok ïaki nongleit nongwan khamtam ïaki khynnah skul bad ki nongrep ki ba kit ïaki mar rep jong ki.
U Rangbah Shnong u la ïathuh ruh kane ka jingpynsngew ïaka jingeh halor utei u surok kam dei kaba tang mynta hynrei ngi la dep ban ïa thuh bad pynpaw ïa kane kajuh ka jingeh sha u SDO haki sngi kiba la leit, namar ka jingbym pynsngap bad ka jingleh bym suitñiew ïa daka tnad PWD ka la pynlong ïangi ban tur paidbah sha ka ophis treikam u SDO mynta ka sngi.
Ngim pyrshah ïaka jingwan ka roi ka par ha katei ka thaiñ, hynrei kam dei pat ban thud haka leit ka wan jong u Paidbah uba bun, “La ong u Rangbah Shnong”. Shuh shuh u la ong ba haka jingshisha ka la dei ban don ka jing ïa pynbeit ha shwa ban pynpra ïaka bynta jong u tei u surok, hynrei kam shem la don kano kano ka jing ïa kren ki la shu pynpra khlem ka jingïatip lang.
U bah Mathius u la ïathuh ruh ha kane ka jingïa kynduh bad u SDO, naka liang u SDO u la kular ba un pynbha mardor ïa u tei u surok dakaba siang shwa daki maw bad yn sa pyndep ïaka jingsiang rong hadien ba la rang slap. Lada kane ka jingkular kam poi sha eiei naka liang ka Shnong kan sa shim pat da kiwei ki sienjam kiba kham tyngeh ban pynïoh ïa u surok uba bha ha katei ka bynta ba la shah pynpra, “pynpaw u Rangbah Shnong”.
