Pulom ka Entry-Exit Point ha Umling, kylla ktem awria ka COVID Screenning Centre

Ka Entry-exit Point kaba la kylla COVID-19 Screenning Centre u snem 2020 ha Umling, Ri Bhoi District ka la kylla iingjah hadien ba la kut ka khlam COVID-19, bad la lap bun ki bynta jong katei ka iing ki la julor bad kylla kum ka ktem leh kam sniew namar bym shuh kiba peit ia katei ka iing. Ka sorkar jylla ka la plie ia katei ka entry-exit-point ha Umling ha u snem 2020 hadien ka jingdawa ki kynhun sengbhalang bad ki seng sain hima ha kito ki por namar ka jingwan rung kyrthep ki bar jylla ka long kaba shyrkhei hapoh ka jylla, hynrei kam shym la ioh ban treikam katkum ka jingthmu namar la pynkylla noh kum ka COVID-19 Screenning Centre.

Kumba long mynta ka entry-exit point ha Umling ka la pulom bad kam don jingmut shuh, namar ka sorkar ka la shu ieh iingjah hadien ka khlam Covid-19 bad ka kylla kum ka ktem kam sniew.Kum ban pynpaw ia ka Entry-exit Point ha Umling la plie da u Symbud Myntri Rangbah u bah Prestone Tynsong ha ka 22 tarik Nohprah 2020 ha ka jingdonlang u Myntri ka tnat C&RD bah Hamletson Dohling, myntri kam rep bah Banteidor Lyngdoh, u MLA ka Umroi bah George B Lyngdoh, MLA Jirang bah Sosthenes Sohtun, MLA Umsning bah Jason Mawlong bad ki ophisar sorkar.

U Bah Prestone ula ong, ka jingplie ia ka entry point Umling kaba long kaa donkam ban shim jingkhein ia ki briew ba wan na shabar jylla shwa ban rung ha Meghalaya, la ki dei kiba wan shnangkai ne wan trei bylla lane ha ki ophis sorkar. Hynrei ka long tang ka jingpynthame ia ki paidbah ban ioh myntoi lade ha ka sain hima. Ia kane ka kyrdop talasi mynder la shna ha ka jinglut ba T.2.70 klur, hynrei kumba long mynta ka sorkar ka la shu bret kai ia katei ka pisa tang ban pynbiej ia ki sengbhalang bad ki paidbah ka jylla.