Ka Shillong Press Club ka pynpaw ka jingsngewkhia halor ka jingjia ha Shillong Press Club hynne ka sngi, ha kaba la iohi ia ki dkhot jong ka Hynñiewtrep Youth Council bad ki pulit ka Jylla ba ki la ialum shabar ka Press Club halor ka jingthmu jong u Bramachari Mukundanand, u nongmihkhmat ka Jagatguru Shankaracharya Swami Avimukteshwaranda Saraswati ban iakren bad ki nongthoh bad nongpathai khubor ha ka por 1 baje nohphai sngi.U President ka SPC u Bah DL Siangshai bad u General Secretary u Bah DS Diengdoh, ki la pynpaw ba ka Shillong Press Club ka dei ka kynhun ba laitluid bad ka bym iashah liang, ha kaba uno uno ne ka kynhun khlem da khein ia ka jaidbynriew, ka niam la pdiang sngewbha ban pynlong jingialang bad ki nongthoh khubor halor kino kino ki mat.
“Ka jingdon jong ki pulit bad ki nongialam sengbhalang mynta ka sngi ka pynhiar dor ia ka Shillong Press Club bad la kynnoh ba ka la pynsangeh ia katei ka jingialang pathai khubor ba la thmu ban pynlong,” la ong ki nongialam ka SPC bad bynrap, “Ngi kwah ban pynshai ba ïa ka jingïalang bad ki nongthoh khubor la pynsangeh syndet da ki nongialam ka kynhun (Bramachari Mukundanand) ym da ka Shillong Press Club. Hadien ka jingïakren bad u President ka SPC, ki nongïalam ka HYC ki pynpaw ba wan sha katei ka jaka kam mut ba ki pyrshah ia ka Club hynrei ki wan ban kynduh ia ki nongialam ka Gau Dhwaj Sthapana Bharat Yatra kiba thmu ban pynlong ia ka jingialang bad ki nongthoh khubor ban pynbna ïa ka Masi kum ka Kmie jong ka Ri. Ban shu kdew katei ka jingleh ka dei tang ka jingmutdur namar ym shym la kdew satia ha ka shithi ba la phah sha ka Shillong Press Club.
“Kum ka jingpyntip ia baroh, ka Shillong Press Club kam ju ai kano kano ka jingthoh ban pynlong jingialang bad ki nongthoh khubor ha Press Club. Kane ka long ka jingpynshai halor ka jingjia mynta ka sngi, na ka liang u President ka SPC ula phone ïa ki dkhot ka Jagatguru Shankaracharya Swami Avimukteshwaranda Saraswati ban kylli halor ka jingslem jong ki ban poi ha Club bad ki jingkynnoh ba ka SPC ka kyntait ban pynlong ia ka jingialang bad ki nongpathai khubor ka long kaba khlem nongrim” la pynkut ki nongialam ka SPC.
