U Myntri ka tnat Social Welfare u Bah Paul Lyngdoh hynne ka sngi u la pyntip ka tnat ka la shimkhia ban kyntiew ia ka bainong jong ki dkhot ka Village Defence Party (VDP). Ia kane u Bah Paul ula pynthikna hadien ka jingialang bad ki 10 tylli ki Dorbar Shnong kiba hap hapoh ka West Shillong Constituency ha ka jingdonlang ki heh ophisar ka tnat kam pohiing (Police), SP ANTF, SP City bad ki heh ophisar ka tnat Social Welfare. “Haduh mynta ki dang don tang 17 tylli ki kynhun VDP hapoh ka Nongbah Shillong bad ha ka jingialang nga la kular ia ki Dorbar Shnong ban ialeh katba lah ban kyntiew ia ka bainong jong ki dkhot ka VDP” u la ong.
Haba kren sha ki lad pathai khubor u Bah Paul ula ong, “Ka jingialang ka dei ban iakren halor ka jingiai kiew ki kam khaii bad dih drok hapoh ka thain Lumsohphoh, Upper Mawprem bad ka Mawbah kaba la pur ruh sha baroh kawei ka Nongbah Shillong”. U Bah Paul ula iathuh ha ka jingialang, la iakren halor ki daw ba pynlong ia ka kam khaii bad dih drok ba kan nangkiew hapoh kane ka thain namar ka jingbym lah ki bor pyniaid ka Shillong Cantonment Board (SCB) ban peitngor bad phikhir ia ka rung ka mih ki briew ha kane ka thain.
“Ka la don ka jingai jingmut ba la donkam ban pyntreikam noh ia ka ain Meghalaya Residents Safety and Security Act (MRSSA) khnang ban ioh pynrung kyrteng ia ka rung ka mih ki briew hapoh ki shnong kum kawei na ki sienjam ban iakhun ia ka jingjur ka jingiakhaii bad dih drok hapoh ka thain” la ong u Bah Paul. Haba ia dei bad ka jingkynnoh ba duna bor Pulit ban iakhun pyrshah ia u drok, u Myntri ka tnat Social Welfare ula ong, “Ia kane ka mat la iakren bun sien bad ka jingpynbun bor Pulit ka la iaid shakhmat lyngba ka jingkhot thep kam thymmai bad hadien ka jingpyndep baroh, ka tnat kan sa lah ban pyndap ia ka jingduna bor pahara”.
