Saw ngut ki heprit na ka shnong Mawlangwir,1 KM na Mawkyrwat ha South West Khasi Hills District ki la shu lait salit na ka jingngam jyllop ha ka Wah Maweitksar, kaba don ha ka shnong Mawlangwir lyngba ka jingwan lap jong uwei u heprit ba shlur uba dang 14 snem ka rta uba la ioh ban pyllait im ia 3 ngut napdeng jong ki, katba ia uwei pat la ioh ban pyllait da ki kynthei kiba saitjain.Katkum ka jingiathuh jong ki briew na ka shnong Mawlangwir, la iathuh ba katei ka jingjia ka la jia ha ka step jong ka 25 tarik Jymmang, 2024 ha ki por kumba 10:00 baje eiei ha kaba 4 ngut ki khynnah kiba dang hapoh 12 snem ka rta ki la leit sum bad jngi ha kawei ka jaka saitjain . la iathuh ba katba kine ki heprit ki dang iamuja ban ïalehkai ha ka um kumno re kumno ki la liat na ka jaka ba don ka dewbilat bad poi ha ki bynta ba kham jylliew bad ha kata ka por ki briew kiba don hajan kiba dei ruh ki kynthei ba wan saitjain, ki la ia pyrshang kat lah ban iarap bad artad ha kajuh ka por ban pyrta briew ban wan iarap.
La iathuh ba ha katei ka por, u heprit Kisen Wanniang (14 snem) na ka shnong Mawlangwir uba dang saitjain hajan kata ka jaka hi, u la iohsngew bad mar mar u la wan mareh bad noh shapoh um ha kaba tang katto katne por u la lah ban sei noh 3 ngut hapdeng kitei ki khynnah sharud wah, hynrei la ong ba uwei napdeng jong ki, u la shitom jur hadien ba u la kum nguid um bad la hap ban pynkit noh mar mar sha Mawkyrwat Civil Hospital ban ioh jingsumar. La iathuh ruh ruh ba ia iwei pat i heprit la ioh ban pyllait im noh da kaba kita ki briew kiba don hajan kiba la shu kawang da ka jain ha kaba kata ka khynnah ka la ioh ban ksoh lyngba ka jingiarap jong ka kong Badeishisha Lyngdoh (32 snem) lem bad kiwei de ki briew.
Kitei ki saw ngut ki heprit kiba la shu lait salit na ka jingngam jyllop ki kynthup ia u Gidian Thongni (9 snem) uba la shah sumar ha Civil Hospital Mawkyrwat, ka Naphisadona Thongni (11 snem), ka Haphibansuk Thongni (10 snem) bad ka Carefully Thongni (12 snem), kiba dei hi na ka shnong Mawlangwir bad kiba dang leit skul ruh hapoh ka Eitser Presbyterian LP&UP School, Mawlangwir.U heprit Kisen Wanniang ruh udei hi na ka shnong Mawlangwir bad u dang pule Class-IX mynta hapoh ka Presbyterian Higher Secondary School, Mawlangwir.Ha kaba iadei bad kane ka jingjia, na ka liang ka Dorbar Shnong Mawlangwir ha ryngkat bad ki bahaiing hasem jong kitei ki khynnah ki la ai khublei kyrpang ia u heprit Kisen Wanniang uba la leh ia kane ka kam shlur bad ki la kitbok kit rwiang ruh na ka bynta jong u.
