Ka Jaiñtia National Council (JNC) hynnin ka sngi ha ka jingialang lehkmen ia ka jingdap 9 snem pura ka jingiaid lynti ka seng ha Community Hall Khliehriat West, East Jaiñtia Hills District ka la pyllait paidbah ruh ia ka thup jingrwai (music video) ba ai kyrteng “Ri Jaiñtia” ha YouTube Channel “JNC-Jaiñtia National Council” ba la rwai da ki dkhot ka seng.
Ka daw ba pynlong ia ki ban thaw ia kane ka sur jingrwai halor ka Rilum Jaiñtia dei hadien ba ki la iohi ha ka jingrwai Anthem ka jingdap 50 snem ka Jylla Meghalaya ym shym la pynrung ia ki kyntien Pnar.
Ha jingialang pyllait paidbah la sakhi lang u Bisharbha Pala kum u kongsan, ki nongialam sengbhalang ba kynthup u Jersome Shylla President JSU, u President JSM u Lenning Star Rymbai, u K. Ksoo nongiasaid aiñ ba pawnam ka thaiñ, ka kong Jhanita Siangshai nalor ki dkhot ka seng bad kiwei ba shah khot sngewbha.
U Jersome Shylla haba kren u ong kum ki sengbhalang wat la pher ki rong sopti kawei na kiwei ruh hynrei ki don kajuh ka thong kata ban iada ia ka ri bad jaitbynriew. U ong ruh ba ka seng JSU kaba u don ka la iatreilang na ka bynta ka jingbha ka imlang sahlang bad kumjuh ruh ula pynkynmaw halor ka jingdonkam ia ka ILP ha ka Jylla ba bun ki paidbah ki sngewthuh bakla ia ka da kaba ong ba kan sa ktah ia ka kamai kajih, hynrei ka jingshisha hi ka long tang kum ka licence ban peit bniah ia ki briew ba rung ba mih namar kumba long mynta katba mon ki bar Jylla ki rung ki shong ki sah ha ka Jylla.
U President JSM u Lenning Star Rymbai ula kren halor ka jinglong nongialam bad kiei ki bynta ba donkam ha kita ki nongialam ba shisha.
U K.Ksoo haba iaroh ia ka jingiaid lynti ka seng JNC ba ka dei ka seng ba stad ba shemphang ban shim ia ki mat bapher bapher, u pynkynmaw ruh ia ki kyntien ba kren u woh Kiang Nangbah shwa ban shah phasi da kaba u ong, lada phai ka khlieh jong nga sha ka mon hapoh 100 snem yn laitluid ka Ri, kumta u buh jingkylli ia ki paidbah ki sengbhalang ba kin pyrkhat bha hato ngi la ioh shisha mo ka jinglaitluid mynta ha ka leit ka wan, ka imlang sahlang, ka kamai kajih, ka jingiada ia ka jaitbynriew bad iaka jubab la da ym ioh mynta ruh ha kano kano ka por yn sa ioh.
U kyntu ruh ba kin nangtrei bha shuh shuh shakhmat naka bynta ka jingbha ka pateng khlem da buh jingkylli ia ki pateng ba shadien.
Nangta ban long ruh ki briew ba pynjanai ia lade ym tang ha ka bor met hynrei ha ka bor jabieng, bor mynsiem khang ban lah iakhun ia kino kino ki jingeh ba wan.
U President JNC Sambor Lyngdoh haba kren u ong, 9 tylli ki snem sngew kumba dang lyngkot bha, hynrei lada phai pat sha ka jingiaid lynti ki dkhot kam dei shuh kaba kai bad kaba pynpar ñiangkhriat ruh, namar ha ka jingialeh na ka bynta ka jaitbynriew ki la mad shibun ki jingshah pynshitom, shah bom ha ki bor ka aiñ bad shah pynngat kyndon.
U kynmaw ruh ba ha ka por ba lehkmen dap 1 snem ka seng ula shah kem khlem kino kino ki daw, namar ha kito ki por ia ka bor ka judicial la bat da ki DC, SP bad magistrate ha kaba ki la leh katba mon tang ban ioh pynngat kyndon ia u ryngkat ka jingdonkti lang ki nongmihkhmat ban ai ding na ka bynta ban kem ia ki dkhot ka seng. Bad ruh ha ka rta ba dangrit u ong ka seng ka la shim ia ki mat khlem da pyrkhat ia ka jingshah ktah ki MLA MDC MP hynrei ki peit ia ki mat ba shah ktah ka jaitbynriew.
U ong ruh ba ha ka por ba u shong phatok 4 bnai, ka wan ka jingpyrkhat ha u ban iehnoh ia ka kam shakri paidbah ka daw ba la don ka jingshah pyntieng pynsmiej ha kito ki por bad ruh ba jur ka jingduh jingkyrmen namar bym ioh ia ka jingbishar ba hok ka daw dei ba bat ka executive ia ka bor ka judicial.
Hynrei pat hadien ba ula lait phatok u sngew ba la jah lut ki jingpyrkhat bad u sngewheh biang ka mynsiem ban shakri paidbah tad haduh kane ka sngi.
Nangta ula pynkynmaw ruh halor ki nongrim jong ki lai tylli ki mawbynna ba don ha ka moto ka seng ba kynthup ka Tipkur Tipkha, Tipbru Tipblai bad kamai ia ka hok.
Na ka liang u kongsan u Bisharbha Pala haba kren kum u kongsan ha kane ka sngi ula iaroh ia ki kam ka seng JNC bad kitbok ruh ba kan nanglah trei kham bha shuh shuh shakhmat na ka bynta ka jingmyntoi ka imlang sahlang bad ka jaitbynriew hi baroh kawei.
Shwa kane la ioh ka jingpynsngew ia ka report treikam ka seng na u Wanshwa Suting General Secretary ka JNC, ka jingkren pdiang na u Ency Shadap Vice President JNC bad kiwei ha ka jingialang ba pyniaid da u Mehi Rymbai Art & Cultural Secretary JNC.
