Pyllait Manifesto ka VPP, kloi ban ïa treilang bad kiwei ki seng saiñ pyrthei

U Nongaiktien ka Voice of the People Party (VPP) u Bah Batskhem Myrboh, ula ong ba ka VPP ka kloi ban iatreilang bad kano kano ne kino kino ki seng saiñ pyrthei ha ka ri India lada ki ïengskhem halor ki nongrim jong ka Riti Synshar ka ri ne ka Constitution of India. U Bah Batskhem Myrboh ula kren ia katei hadien ba la dep pyllait paidbah iaka Election Manifesto jong ka seng VPP kaba la long ha Lady Bird Hotel, Umsohsun hynne ka sngi. Halor ka jingkylli lada ka VPP ka jop ia ka elekshon MP Lok Sabha kan don ha ka Liang Synshar ne ha ka Liang Pyrshah, u Bah Batskhem Myrboh ula ong “Ka VPP ka kut jingmut ban iengskhem ban pynthikna ba ka jinglong laitluid ban mane Blei kadei kaba hap ban pynneh beit, da long katba long, lada ka VPP ka hap ban ieng marwei ruh kan hap ban ieng”.

Ula ong, ba ka VPP ka iengskhem halor ki nongrim jong ka riti synshar ka ri bad kano kano ka seng sain pyrthei kaba iengskhem ha kaba iadei bad ki nongrim jong ka riti synshar ka ri, ka VPP kan iatrei bad kata ne kita ki seng saiñ pyrthei. Haba phai sha ka jingpyllait ia ka Election Manifesto, ia kane ka mang treikam elekshon MP Lok Sabha la pyllait da u Vice President ka VPP u Dr Kara H Shen ha ryngkat ka jingdonalng ki nongialam ka VPP. Katkum ka Election Manifesto ka VPP la pynpaw ba kan wanrah ia ka jingsynshar kaba larkam halor ka nongrim da ka jingtreihok, jingkhuid bad jingkitkhlieh ban pynthikna ba ki paidbah kin ioh ia kaba kidei hok ban ioh.

Ka VPP kan pyrshah iaka jingpyntreikam ia ka Citizenship Amendment Act 2019, ban pyrshah ia ka Uniform Civil Code Bill, ban pyrshah ban tih ia u Uranium ha Meghalaya, ban pyrshah ia ka lynti rel ha rilum Khasi bad Jaintia khlem da pynthikna shwa ia ki lad ai jingiada na ka jingrung kyrthep ki briew kiba nabar. Ban pynrung ia ka jylla Meghalaya ha ka Article 371 ban pyllait ia ka jylla na ki ain jong ka sorkar pdeng ha kaba iadei bad ki riti ki dustur bad ka hok longtrai ia ka khyndew ka shyiap, ban pynbeit bad kham pynjanai iaka Khyrnit kaba Hynriew jong ka riti synshar ka ri ban pynkhlain bad pynbha ia ka jingtreikam ki rukom synshar ri, ban dawa pynrung ia ka ktien Khasi haka khyrnit kaba Phra jong ka riti synshar ka ri, ban pyntreikam ia ka Inner Line Permit ha ka jylla baroh kawei.

Nalor kane kan khmih biang ia ka jingpynbeit pud hapdeng ka Assam bad Meghalaya ban dawa ia ka jingshimkhia ka sorkar pdeng ban pynbeit ia ka jingiakajia hapdeng ka Meghalaya bad Assam ha kaba iadei bad ka Block 1 bad Block 2 bad kiwei kiwei ki mat ban kyntiew ia ki paidbah bad iaka jylla baroh kawei.