Ka kot shaphang ka riti kheiñkur kheiñkha na ka kmie ba la jer ‘MEI- Matrilineal Exogamous Institution’ ha ka ktien phareng la pyllait paidbah da u Bah Prestone Tynsong, Symbud Myntri Rangbah, ha ka ba ia don ryngkat ki kynrem lyndan na kylleng ka thaiñ Shatei Lammihngi kynthup ia u Bah Pyniaid Sing Syiem, Chief Executive Member (CEM), Khasi Hills Autonomous District Council bad kiwei.
Ha kane ka jingpyllait kot la ia don lang ruh u Promod Boro, CEM, Bodoland Territorial Council, u Pradyot Manikya Debbarma, Chairman Arc, Tripra TAADC, u Puma Chandra Jamatia, CEM, TTAADC, u M Laikaw, CEM, Mara Autonomous District Council, u Tuliram Ronghang, CEM, Karbi Anglong Autonomous District Council, u C lalmuanthanga, CEM, Lai Autonomous District Council, Rasik Mohan Chakma, CEM, Chakma Autonomous District Council, Bah Thombor Shiwat, CEM, Jaintia Hills Autonomous District Council,u Albinus Marak, CEM, Garo Hills Autonomous District Council, Bah Lamphrang Blah, Chairman, Khasi Hills Autonomous District Council, Bah Pynshngaiñlang Syiem, Deputy Chief Executive Member, KHasi Hills Autonomous District Council, Bah Charles Marngar, Deputy Chairman, Khasi Hills Autonomous District Council, Bah Totosstar Well Chyne, Leader of Opposition, KHADC bad kiwei ki heh na ki district council jong ka Thain Shatei Lammihngi ka ri India.
Ka kot ba la thoh da u Bah Raphael Warjri ka dei ka ba la tih sani da ki bun phew snem bad tohkit ruh ia ka dustur kheiñjait na ka kmie ha satlak pyrthei bad kynthoh ha ki jingjia ki ba iai jia ha ka imlang sahlang ba man la ka sngi. Kane ka kot ba la pynmih da ka Riti Academy ryngkat bad ka (INTACH) Indian National Trust for Arts and Cultural Heritage, Meghalaya Chapter ka dei ka ba la thwet bniah katkum ka stad maian ka juk mynta ha ka ba iadei bad ka dustur shim jait na ka kmie. Ka rong ka taw ba la pyllait ia ka kot ka dei ruh shi bynta na ka ba plie paidbah ia u motsahnam jong u Rev J J M Nichols Roy ba la pynieng ha Lariti International Cultural and Performing Arts Centre. La tei ia u mot da ka KHADC ban rakhe sahnam ia ki kam radbah jong u Rev J J M Nichols Roy kum u nongmaitphang bad nongthaw ia ka Khyrnit Bahynriew jong ka Riti Synshar ka Ri India.
