Pyllait u Lat ia ka kali IEC ha Raj Bhawan na bynta ki jaka sor

U Lat ka jylla Meghalaya, u Phagu Chauhan u la pyllait paidbah ia ka kali IEC (Information, Education and Communication) Van na ka bynta ki jaka sor hapoh ka Viksit Bharat Sankalp Yatra na Raj Bhavan Shillong haka 1 tarik Nohprah. Kane ka sienjam, kaba la sdang na Khunti, Jharkhand, ha ka 15 tarik u Naiwieng, 2023, ka dei kaba kyrpang na ka bynta ki jaka rilum bad kaba la pyniar mynta ban peit lang ia ki jaka nongkyndong bad ki jaka sor.
Ha Meghalaya, kane ka kali kan poi sha ki dong ha kylleng ka jylla. Kane ka Yatra ka dei ka dak jong ka kam ai jingtip kaba heh tam jong ka Sorkar India. Ka don nongrim ha ka roi ka par kaba pdiang lang ia baroh, bad ka thmu ban pynthikna ba ki jingmyntoi na ki skhim sorkar ki poi sha baroh ki bynta jong ka ri. Man ka sngi, kine ki kali kin sangeh ha ar tylli ki jaka bad kin plie lad ia ki health camp, ka jingkyntiew kyrteng Aadhar bad kiwei kiwei ki jingai jingshakri.
Ki jingioh jingtip mardor ba la plie lad da ki kali Information, Education, and Communication (IEC) van, ka dei kaba poi ha ka rynsan ba la sdang da ka Digital India Corporation hapoh ka tnat Electronics bad Information Technology.
Ka thong jong ka Viksit Bharat Sankalp Yatra ka dei ban ai jingtip bad pynpoi ia ki jingmyntoi jong ki skhim kiba iadei bad ka jingkhuid, ki kam pisa, ka bording, ki iing sah briew bad kiwei kiwei. Ki skhim ba kham kyrpang ki long ka Ayushman Bharat, PM Garib Kalyan Anna Yojana, PM Svanidhi bad PM Awas Yojana, ha ryngkat kiwei kiwei.
Ka Yatra ka dei ka dak jong ka jingjam shaphrang ban pynurlong ia kane ka thong lyngba ka jingai jingtip bad ka jingpynkupbor ia ki briew jong ka ri ba kin iadon bynta ha ka roi ka par jong ka ri.
Ka prokram ha Raj Bhavan ka dei kaba la wan iashim bynta lang da ki ophisar na ka Sorkar Jylla bad ki ophisar na ka Tnat ka Koit ka Khiah, Civil Supplies, MUDA Authority, District Lead Bank Manager bad Shillong Municipal Board bad Social Welfare. Ha kane ka juh ka sngi la don ka prokram ai jingtip hajan Polo ha Shillong ha kaba ki tnat bapher bapher ki la iashim bynta. La sam ruh ia ki certificate ha kane ka jaka ia ki nongioh jingmyntoi na ka PM SVANidhi.