U MP ka Tura u Saleng A Sangma ula kynnoh ba ki seng sain pyrthei ba don ha ka sorkar ki la shu pynbiej ia ki paidbah da ki jingai sngewbha tang ban khring vote. Haba kren sha ki lad pathai khubor u Saleng ula kam ba ka sorkar ha kane ka ilekshon shiteng samoi ha Gambegre ka la pyrshang ban ialam bakla ia u paidbah. U la ong, kiba bun ki seng sain pyrthei ki shu pynlong kam kai tang namar kane ka election, hadien ba la dep thep vote ki paidbah nongjied kin sa shu shah ieh kumto.
Ha kajuh ka por u nongialam ka Congress ula ong, ba ka election kam dei ka jingiakhun hapdeng ki seng saiñ pyrthei, hynrei ka dei ka jingshaniah jong ki paidbah ia kino kino ki kyrtong kiba tyrwa ban shakri ia ki paidbah ka konstiwensi..
U la ong ba kam don kano kano ka shap ba la tah ha u briew ba u dei na kata kata ka party, bad ka long kaba bakla ban ong ba ka jingiakhun ha ka election ka dei hapdeng ka NPP, ka TMC lane ka Congress hynrei dei ki paidbah kiba rai u nongialam uba kumno bad ka seng kaba kumno ka ban wanrah jingbha ia ka lawei jong ki.
