Naduh ka 6 tarik Naitung ka Khasi Students Union (KSU) kala beh krad ia palat 2500 ngut ki nongbylla bar jylla kiba wan rung be-ain khlem kot khlem sla sha Meghalaya. Ia kane la pyntip da u President ka KSU samla Lambokstarwell Marngar ha ka jingrakhe ia ka lyngkhuh sngi iap ba 189 snem jong u Nongiakhun Laitluit ka Ri-lum Khasi-U Tirot Sing Syiem bala pynlong ha Nongbah Shillong. Lah ban kdew baka KSU kala sdang ka jingkhynra Labour Licence bad Work Permit naduh ka 6 tarik Naitung bad haka juh ka por ka seng kala pynieng ruh iaki khyrdop Inner Line Permit (ILP) ha 4 tylli ki District ka Meghalaya. Haba kren ha kane ka sngi, u Samla Lambokstar ula pynbna ruh ia ka rai jong ka KSU ban nang pynkhlain ia ka jingkhynra iaki kot ki sla jong ki bar Jylla kum ka dak ban pyrshah ia ka jingbym lah jong ka Sorkar Jylla ban pyntreikam ia ki ain kiba la don lypa ha Jylla kynthup ia ka Meghalaya Residents Safety & Security Act (MRSSA), 2016 nalor ban pynbor ia ka Sorkar Pdeng ban pyntreikam noh ia ILP.
“Ngin iai bteng ban pynjur ia ka jingtalai ia ki kot ki sla jong ki nongbylla bar jylla wat hapdeng ki jingkem jong ki Pulit ia ki dkhot ka Seng” la ong u samla Lambokstarwell. Haba pynpaw ka jingsngewdiaw iaka jingleh shilliang khmat ki bor Pulit bad ka Sorkar Jylla u president ka KSU u buh jingkylli daka ba ong “Ngi kwah ruh ban tip ba haduh katno tylli ki case ba ka Sorkar kala mudui pyrshah ia ki nongbylla bar jylla ba khlem kot khlem sla bad kaei kaba kila leh pyrshah ia ki contractor kiba pynkhein ia ki Rules”. U samla Lambokstarwell ula ong “Ha ka jingshisha, ngi lei ngi pyrshang ban iarap ia ka Sorkar ban lah pyntreikam bha iaki ain kiba la don lypa hynrei ngi la shah kynnah pynban ba ngi shim ia ka ain hala ka jong ka kti. Ka KSU lem bad kiwei ki Sengbhalang kila shah pynbor ban leh eiei khnang ba kan long ka jingkyrsiew thiah ia ka Sorkar Jylla”.
Ula ong ba ka Sorkar Jylla ha u snem 2011 kala wanrah ia ka amendment ia ka Meghalaya Inter-State Migrant Workmen (Regulation of Employment and Condition of Service) Rules, 2011 bad kala thung haduh 39 ngut ki Labour Inspector ki ban leh eiei halor ka jingrung kyrthep ki bar jylla.Ha kajuh ka por ka KSU kala thalain tyngeh ia ka Sorkar Jylla halor ka jingpyndik ia ki dkhot jong ka Seng da kaba hukum ia ki Pulit ban leit kem ia ki ha ka por mynmiet. “Namar kata , ngin sa rai ia kaei kaba ngi dei ban leh nangne shakhmat hynrei ka jingtalasi hi kan iai bteng wat hapdeng ki sienjam ba pyrshah bala shim da ka Sorkar Jylla” ula ong.
