Ka skulbah North Eastern Hill University (NEHU) hynne ka sngi ka la pynbna ba kan sdang noh ia ka jingai jinghikai kaba la tip kum ka Integrated Teachers Education Programme (ITEP) kaba 4 snem na ka bynta ki samla pule ka jylla kiba kwah ban pyntbit ialade ha ka kam hikai.
Ia kane la pynbna da u Vice Chancellor ka NEHU u Prof. PS Shukla ryngkat ka jingdon lang ka Prof BB Kharbi Rymbai kila pyntip ba kane ka jingpule kaba 4 snem kaba don haduh 8 Semester bad kadei kyrpang na ka bynta kito kiba don ia ka jingthmu ban long ki nonghikai kiba la pyntbit ialade ha ka kam hikai.
Ka jingthmu jong kane ka jingpule ka long ban pynmih ia ki nonghikai kiba tbit, kiba don kyrdan bad kiba la shemphang bha ha kaba kin lah ban ai iaka jinghikai kaba paka ia ki khynnah bad ki samla pule ha ki kyrdan bapher bapher. Kila iathuh ban ioh ban pule ia ka ITEP ki samla kiba applai kin hap ban iakhun ia ka National Common Entrance Test (NCET) kaba la pynlong da ka National Testing Agency (NTA) man la u snem.
