U Sñiawbhalang Dhar symbud myntri ka sorkar Jylla, hynne ka sngi haba leit sakhi kum u kongsan iaka lehniam shad Behdeiñkhlam ka Seiñraij Ïalong ula pynbna paidbah ruh ba ula dep mang kumba 25 klur ei ei ka project naka bynta ki jingtrei bapher bapher ha baroh kawei ka shnong Ialong, bad kane ka kynthup ruh naka bynta ban shna pynbha pynmiat iaka Syiem Aitnar.
Iaki jingtrei ym slem shuh yn sdang bad u khmih lynti ba ha u snem ban wan kane ka Aitnar kan sa kylla dur bad long ruh kaba itynnad.
U ong ia kane ka pisa la mang dei hadien ba ka shnong Ialong kala dep aiti dorkhat ha u Myntri Ryngbah ka Sorkar Jylla u Conrad Sangma mynshym snem haka por ba u wan ïuh kjat ban sakhi ia kane ka Behdeiñkhlam.
Ha kane ka sngi pynkut iaka Behdeiñkhlam ka Seiñraij Ïalong la wan don lang ruh u Shitlang Pale MLA barim ka Sutnga Saipung Constituency, u Dolloi ka Elaka Jowai u Puramon Kynjing, u President Seiñraij Jowai u H.Toi, ki khlieh nongialam Seiñraij bad Ñiamtre bapher bapher, nalor kiba shah khot sngewbha.
Haba iadei bad ka jinglehniam Behdeiñkhlam u President ka Seiñraij Ïalong u Pyrkhat Shylla u iathuh ba iaka jinglehniam kila sdang naduh ka 4 tarik bad pynkut mynta ka 12 tarik, halor ka nongrim ban beh iaka khlam ka pang ka shitom bad ki jingsniew ba bunjait haka imlang sahlang, nalor ban bha ka rep ka riang bad kiew ka pule puthi.
Ha kane ka Behdeiñkhlam Seiñraij Ïalong la shim bynta lang ka Raij Wahiajer, Raij Nongkhyllep bad baroh ki dong ba don hapoh ka shnong Ialong.
Lyngba ki rot ki rong bala wanrah hapoh ka syiem Aitnar daki khun ka Seiñraij Ïalong don ruh kiba wanrah ryngkat ki khubor shaka imlang sahlang.
Haba iadei bad ki jinglehniam u President Pyrkhat Shylla u iathuh ba hapoh ka Raij Ïalong ki don artylli ki jinglehniam kawei dei ka shad sukra Nohsakyriat bad ka Behdeiñkhlam. Haka Behdeiñkhlam la shim bynta ban shad tang ki shynrang katba ki kynthei pat ki shu pynphuh pynphieng.
Katba haka shad sukra Nohsakyriat kaba ki juh pynlong ha u bnai April pat la shim bynta tang ki kynthei.
