Ka Armed Police Training Centre kaba don ha 6th Battalion jong ki pulit ka jylla Meghalaya ha Umran, Ri Bhoi District, mynta ka 9 tarik u Naitung, ha ka passing out parade kaba 4 kaba la pynlong ka la ïoh ban pynkup burom ia ki 104 ngut ki pulit Unarmed Branch bad 7 ngut ki Follower kiba la pyndep ïa ka jinghikai ha kine ki khyndiat bnai ba la dep, ha kaba la wan ban pynkup burom ia ki da ka Kong Idashisha Nongrang, Director General of Police ka jylla kum ka kongsan, ha ka jingïadon lang u Ritu Raj Ravi Commandant ka 6th MLP Battalion, APTC Umran, lem bad kiwei pat ki heh ophisar ka tnad pulit ka jylla Meghalaya.
Haba kren na ka liang ka DGP, Kong Idashisha Nongrang ka la ai khublei ia kitei ki pulit kiba la pyndep ïa ka jinghikai jong ki, da kaba pdiang burom ruh ia kitei kiba dang rung thymmai sha ka shlem jingshakri paidbah jong ki Pulit ka jylla Meghalaya, da kaba ai mynsiem ia ki ba kin shim mynsiem na ki jingjop jong ki paralok jong ki kiba la ioh ia ki khusnam ha kane ka jingai jinghikai bad kiwei kiwei kiba la nang iai shakri ha kane ka shlem jong ka tnad pulit ka jylla. Ka la pharia ruh ia ki kyntien, da kaba ong, “Nga sngewkmen ban pdiang sngewbha ia phi ha ka longiing jong ki pulit Meghalaya. Ka la ai khublei ruh ïa ka Armed Police Training Centre bad ïaki nonghikai ba ki la trei shitom ban aiti lut met bad mynsiem ban pynthikna ba kitei ki pulit kiba wan ban Shah hikai kin ïoh ïaka jinghikai kaba biang bad Kane ka la long ruh ka jingjop jong ki pulit. Ka la ong ruh Kine ki pulit kiba don bynta ha ka jingïaid paidbah mynta ka sngi ki dei ki dak jong ka jingtreishitom bad jingaiti lut jong phi ha ka kam.
Ka DGP ka la ong ruh, ha ka jingïaid lynti kum ki Pulit ka Meghalaya phin ïa kynduh hynrei ngi dei ban don ïaka jinglong kaba don akor bad ka jinglah ban pyniadei bad kiwei. Shuh shuh ka DGP ka la kyntu ruh ïa kitei ki nongtrei thymmai jong ka tnad pulit ba kin bat ïa ki kyndon, ban shakri da ka akor ka burom haka kam bala bynshet haki bad kumba la hikai bad shim ruh ïaka parade bad ka jingbam smai la khmih lynti ruh ba kin ai ka shakri hok haka tnad pulit jong ka jylla haki sngi ban wan.
