Ka Khun Hynniewtrep National Awakening Movement (KHNAM) hynne ka sngi ka la pynlong ia ka jingshong kyllain morngor ha madan Malki ban dawa na ka sorkar ban pynduh noh ia ka Personal interview ha ki kam sorkar ha kane ka jylla. U Working President ka KHNAM u bah Thomas Passah u la ong ba ka jingdawa ban pyndam noh ia ka Personal Interview ia ki kam sorkar ha ka grade C,D ka dei kaba rit bad kam don jingeh ia ka sorkar ba kan pynduh noh ia ka. “Naduh ka por ka sorkar MDA-1 ngi la phah bun ki dorkhas ban dawa ban pynduh ia ka Personal Interview khnang ban ioh ia ka jingthunng kam ba khuid khnang ba kiba dei hok bad ki khynnah ba tbit kin ioh ia ka kam,” ong u bah Thomas. Katkum ka jingong ka KHNAM, ka jingpyllong ia ka personal interview ia ki kam sorkar ba rit ha ka kyrdan C, D ka la long kum u diengpynkiang ia kiba dei hok ban ioh bad ka la pynioh lad ia kiba don ba em bad kiba don ka jingiajan bad ki briew ha ka bor ban shu ioh suk. U la ong ba ka jingdon ka personal interview ka la ai bor ai mynsiem ban thungkam da kaba shim pisa na kiba ialeh eksamin kam.
“Ka jingdon ka Personal Interview ka ai bor ai mynsiem ia ka rukom thungkam kaba bakla da kaba shim pisa na ki paidbah. U nongialam ka KHNAM u la kynnoh ba ka jingbun ka jingthung kam tuh ka wan ruh na ki kyrdan jong ki nongmihkhmat bad ki MLA ki don bynta ban wanrah ka jingthungkam ba bakla. “Ngi ap khmih lynti mano napdeng ki MLA kiba nud ban kren ia kane ka mat ha ka Iing Dorbar ka ban sa long ha 23 tarik Nailar bad lada kim nud ban kren, ka paw shai kdar ba ki ruh ki ap ia ka dohmet ban ioh thep kam tuh iano re iano na ka konstiwensi jong ki ba kin ioh ia ka Vote,” ula ong bad bynrap ba ka jingsngap ka sorkar ia kane ka jingdawa, ka pynpaw ba ka dei ka sorkar hi kaba thungkam sop sop namar ba ka sorkar India ka la pynduh ia kane, balei ka sorkar jylla kam leh.
U bah Thomas u la ong ba ka sorkar India ka la pynduh naduh u 2016 ia ka Personal Interview bad ki don 23 tylli ki jylla kiba la pynduh, hynrei kaei kaba khanglad ia ka sorkar jylla ban pynduh ia ka Personal Interview. Ula ong ba lada ka sorkar ka dang pyneh, ka KHNAM kan sa shim sa kiwei ki lad ban pynjur ia ka jingiakhih ha ka Jylla.
