Ka Directorate Housing hynne ka sngi ka la pynduh noh ia ka jingtreikam ka Meghalaya State Housing Board da kaba pynkup burom ia ki nongtrei ka Board kiba shim Voluntary Retirement Scheme (VRS) ha ka jingialang ha ophis treikam ka Board ha Madan Laban bad ka jingpynkut ia ka jingtreikam kan long naduh lashai 28 tarik Nailar, 2024.
Haba kren ha ka jingialang u Chairman jong ka Meghalaya State Housing Board u Bah Damanbait Lamare ula pynbna ba ka sorkar jylla ka la shim ia ka rai ban pynduh noh ia ka Meghalaya State Housing Board, kaba dei ka Board kaba ula ioh ban shakri mynta la shisnem shiteng tam kum u Chairman. U Bah Damanbait ula pynpaw ka jngsngewnguh ia baroh ki nongtrei kiba la trei shitom bad ia kito ba la shongthait noh na ka kam bad kiba la khlad noh.
Ula bynrap ka sorkar ka la ai jingiarap da ka song tyngka lyngba ka VRS ia ki nongtrei ban pynthikna ba kin ym shah iehbeiñ khlem ka jingkyrshan ka sorkar. U Bah Damanbait ula aiti ia ka ‘cheque’ ba dei ka Installment banyngkong ia ki 18 ngut ki nongtrei ba la shakri palat 30 snem. Ha kane ka sngi la iadonlang Secretary ka sorkar jylla ba peit ia ka tnad Housing u Bah F.M Dopth, ki heh ka Tnad Housing kynthup ia u Bah Nongsteng, u Bah D Nongsiej bad kiwei de.
