Ka World Food India 2024 ba saw sngi ka la kut hynne ka sngi ha Pragati Maidan New Delhi. Ka Meghalaya Pavillion ka la pyllait paidbah ia ki Meghalaya Collectives kaba long ka jingpynkhreh ba kongsan ban khring ia ki nongbei tyngka ba pawkhmat ha ka kam shna bad pynmih jingbam. Ha kine ki saw sngi ka Meghalaya Pavillion ka la sakhi ïa ki jingseisoh ia ki kompeni ba pawnam ban wad ïa ki lad jingïatreilang kum ka ZEPTO, kaba pynpoi ïa ki marbam online bad ai ïa ka khaii pateng kaba kloi, ka Big Basket, ka dukan die marbam online ba pynpoi ïa ki marbam sha ki nongthied kiba bun jait ha u snem 2020. Ka PepsiCo, ka kompeni na ri America ba shna ia ki marbam bad ki jingdih kaba don ka jaka treikam ha New York. ka kompeni shna jingbam, ka Mother Dairy hapoh ka jingpeit tnad ri dohkha, ri mrad ka sorkar India bad ka National Cooperative Organics Limited (NCOL). Kine ki jingïakren ki la pynpaw ïa ka jingsngewtynnad ha ka liang ka jingpynmih marbam jong ka Meghalaya bad ka jinglah ban don ki jingïatreilang kiba myntoi lang. Ki nongmihkhmat na ki jylla bad ki ri bapher bapher ki la leit jngoh ïa ka Meghalaya Pavilion ban ithuh ïa ka jinglah ka jylla ban kiew ha ka kam khaii marbam, kynthup u Chirag Paswan, Myntri ki karkhana pynmih jingbam bad u Dr Ashish Kumar Bhutani, IAS, Secretary ka tnad treilang ka sorkar India ha kaba ki la ai ka jingïaroh ïa ka jingthmu jong ka jylla ban kyntiew ban pynmih marbam.
Ka Kong Reena Nongrum, ka nongseng jong ka Mewan Food Processing, ka la ïathuh ïa ka jingshem jong ka bad ka la ong, “Nga don hangne ha ka jingïalang jong ka World Food India ha Delhi, bad kane baroh ka dei da ka jingai jinghikai kaba nga la ïoh na ka NABARD. Kane ka dei ka sien ba ar ba nga leit sha Delhi; kaba nyngkong ka long na ka bynta ka Saras Mela, nga don hangne ha ka World Food India da ka jingkyrshan ka Directorate of Food Processing. Kum ka longkmie nga kwah ban phah ka khubor sha kiwei pat ki longkmie, Ngi dei ban iatreilang ban ieng ha la ki jong ki kjat. Ka jylla Meghalaya jong ngi ka long kaba riewspah ha ki spah mariang, ki soh bad kiwei. Da kaba pyndonkam ia kine ki spah mariang ki nongrep kin ym iakynduh jingeh satia’. Katba u Bah Dawhoi Dhar, u Nongseng kam lajong ula ong, ‘Nga la seng ïa ka Naki ban ïasam ïa ki jingbam jong ka Meghalaya bad ka pyrthei. Kane ka jingïalang ka la long kaba ïarap haduh katta katta, ban pynïasoh ïa ngi bad ki nongthied na bar ri, ki nongbei tyngka kiba lah ban wan, bad ki nongshim bynta. Nga la ioh jingtip ba kham bha shaphang ka jingsong, ka jingpyniaid iew, bad kumno ki kompeni heh ki treikam. Nga ai khublei ia ka ophis Directorate of Food Processing, ka Sorkar jylla na ka bynta kane ka lad’.
Kumjuh u Bah Namshrang Ruddiee Diengdoh, uwei na ki nongseng kam lajong u la ong, ‘Kane ka jingpyninam ia ki marbam ka la khring ia ki nongwan na kiwei ki ri bad ki jylla bapher bapher. Ngi la ioh ka lad ban iakynduh bad ki nongbei tyngka na Belarus, Poland, Russia, Turkey, Japan, bad kiwei ki ri Europe. Ngi sngewnguh shibun ïa ka Sorkar Jylla na ka bynta kane ka rynsan ban pyni bad pynïaid iew ïa ki mar rep jong ngi, ban kyrshan ïa ki nongrep ka jylla Meghalaya.’ Ka Meghalaya ha kane ka iew ka la pyni ia ki 20 tylli ki mar ba kyrpang ba la shna kum u shynrai Lakadong ba pawnam, u sohjew Khasi, Sohtrun, sying bad kiwei kiwei mar tynrai na bynta ban pyniaid iew bad khamtam ban kyntiew ia ki nongrep ha jylla. Ka jingthmu ban kongsan ka long ban kyntiew ia ka ioh ka kot jong ki nongrep, ban pynbha ia ka jingmih ki mar rep bad ban kyntiew ia ki mar rep jong ka Meghalaya.
