Ki shipai Border Security Force (BSF) Meghalaya Frontier, ki la pynlong ia ka “Seema Darshan Programme” ha kaba ka la khot sngewbha ia ki samla pule bad ki nonghikai jong ka Commerce College, Shillong sha Border Out Post, Barmanbari ban peit ia ka rukom treikam jong ki shipai iada khappud. La pdiang sngewbha ia katei ka kynhun ki samla pule bad ki nonghikai da u Commandant jong ka 193 Bn BSF u Rajiv Kumar ha kaba la don ryngkat lang ki heh ophisar ka BSF.
Ha kane ia ka prokram la ai ka jingbatai ia ki samla pule shaphang ka rukom treikam ki shipai BSF ha ki kam iada ia ki jaka khappud ka ri India kiba don marjan bad ka ri Bangladesh. Ki BSF ki la pyni bad ai jingbatai halor ki tiar siat bad ia ki tup ki man kaba ki shipai ki pyndonkam ban iada ia ka ri bad ban pynshai ba kam bakhia jong ki BSF kiba kloi ban len ia la ka jingim ban iada ia ka ri bad ia ki nongshong shnong.
Ki nonghikai bad ki samla pule ki la pynpaw ka jingsngewnguh ia ki BSF kiba la pynlong ia kane ka prokram bad kumjuh ban sngewthuh ia ka rukom pyniaid ia ka Border Haat, Balat ha khappud bad ka ri Bangladesh bad ki la leit ruh ban peit ia ki jaka kiba don ha khappud.
+ There are no comments
Add yours