Ka Bethany Outreach Hospital Nongpoh ka la pynhap pyrda noh ïaka jingrakhe dap 10 snem jong ka Hospital kaba la sdang ban rakhe naduh ka 5 tarik jong u Bnai Jylliew. Katei ka jingrakhe jong ka Bethany Hospital ka dei halor ka jingdap 10 snem jong ka Hospital haka jingïaid lynti ka jong ka ban ai ïaka jingshakri sha ki nongpang kiba wan ban shah shumar ha katei ka hospital naduh ba la dep ban seng ïaka ha u snem 2014 dakaba pynlong ïaka program kaba kyrpang ha phyllaw jong ka Hospital, Nongpoh. Kum ban shu pynkynmaw, ka Bethany outreach Hospital Nongpoh ka la sdang ïa kane ka jingrakhe dap shiphew snem ka jong ka naduh ka 5 tarik jong u bnai Jylliew dakaba ïa shim bynta haka jingpynneh pynsah ïaka mariang dakaba leit ban thung ïaki tynrai dieng ha kawei naki khlaw jong ka shnong Pahamsyiem, Nongpoh bad la bteng pat ïakatei ka jingrakhe daki jingïakop bapher bapher kiba kynthup naduh ka jingïakop Dro jingdro naka bynta ki khynnah Skul, ka Jing shaphriang ïaka khubor ba bha halor ka jing nohsynniang ïaka snam, ka jingïakop Mareh thong kaba 5 kilometre bad kaba 10 Kilometre bad kiwei kiwei ki jingïakop kaba la pynlong hapdeng jong kitei ki Bnai. Ka Bethany Outreach Hospital Nongpoh ha kane ka sngi ka la leh ruh ïaka kam kaba khraw Kaba lah ban wanrah ïaka jingmytoi naka bynta ki paidbah hakaba la ioh ban plie paidbah syndon ïaka jaka sumar ïaka jingpang khyllai “Dialysis Unit” ha kaba ki paidbah ki wat ïaka jingsumar Kim donkam shuh ban leit sha bar jong ka jylla hynrei ki la lah ban ioh ïaka jingsumar na katei ka Jaka sumar.
Ha katei ka sngi pynkut ïaka jingrakhe ïaka jingdap 10 snem, ka Bethany Hospital Nongpoh ka la plie paidbah ruh ïa u Motdur sah jingkynmaw jong u Dr. John L Sailo Ryntathiang bam kwai ha dwar u Blei uba dei ruh u trai jong ka Bethany Outreach Hospital, Nongpoh ha kajuh kapor la ïoh ruh ban pynlait paidbah noh ïaka kali kit nongpang jong ka Dorbar shnong Pahamsyiem nongpoh ba la pynlait lyngba ka Skim CMFDS. Ïa kitei ki jingtei thymmai kiba kynthup naduh ka Dialysis Unit, U Motdur Sah kynmaw bad ïaka Thup sah jingkynmaw jong ka Bethany, la plie paidbah noh da ka myntri jong sorkar jylla ba dei peit ïaka koit ka khiah ka Kong Dr. Ampareen Lyngdoh kum ka kongsan haka jingïadonlang u Bah Mayralborn Syiem, MLA Nongpoh Konstituensi bad Chairman jong ka Health and Advisory Board jong ka sorkar Jylla kum u symbud kongsan, Achula D Sailo, Director, Bethany Hospital, Dr. C M Pohshna Dy. Medical Superintendent, Bethany Outreach Hospital, Nongpoh lem bad kiwei kiwei ki Doctor bad ki ophisar. Haba kren ha katei ka jingïalang na ka liang ka Myntri jong ka Sorkar Jylla, ka Kong Dr. Ampareen Lyngdoh ka la ong ba kum ka myntri ba dei peit ïa ka koit ka khiah hapoh ka Jylla ka dap ïaka jingkmen kaba khraw ban ïa sakhi lang bad ki Nongtrei jong ka Koit ka khiah jong ka Bethany Hospital haka jingrakhe ïaka jingdap 10 jong ka jingïaid lynti ka Hospital ban ai ïaka jingsumar sha ki paidbah.
Ka la ïathuh ruh ba dang shen ka la ïoh ban peit ïaka khubor halor ka jinglah jong ka Bethany Outreach Hospital, Nongpoh ban pynkha ïaki 3 ngut ki khyllung, dakaba bynrap ruh, “katno nga dap daka jingkmen ban ïohi ba ki kmie ki kpa jong kitei ki khyllung ki pynpaw ïaka jingkmen hadien ba ki la ïoh ïaki khyllung”, hakaba ka la ai jingïaroh ïaki Nongtrei jong ka Bethany naduh ki Doctor ki Staff Nurse bad kiwei kiwei kiba la donkti ban pyndep ïa katei ka kam kaba khraw bad ka la ai khublei ruh ïa baroh ki nongtrei jong ka Bethany Hospital Nongpoh ba ki la long shisha ki Nongtrei kiba la ai met bad mynsyiem haka kam kaba ki don. Ka Dr. Ampareen ka la ai khublei ruh ïaka u Dr. Sailo (Bam kwai ha dwar u Blei) ba dei lyngba ka jingïohi jngai jong u Dr. Sailo wan rah ïakane ka Bethany Outreach ha Nongpoh ka la wan rah shibun ïaka jingmyntoi ïaka thaiñ Ribhoi bad kumjuh ïaki paidbah jong ka Jylla hi baroh kawei bad ka la ai khublei ruh ïaka ïing ka sem jong u Dr. Sailo ba ki la lah ban bteng ïa kane ka kam kaba la prad lynti da u Dr. Sailo. Shuh shuh Ka Myntri ka la kitbok kitwriang ïaka ïing ka sem jong u Late Dr. Sailo ba kin dang lah ban nang pynkhraw ïa kane ka kam bad ha kajuh kapor ka la kyntu ruh ïa baroh ki Nongtrei jong ka Bethany Outreach Hospital,Nongpoh naduh ki Doctor, Ki Nurse bad kiwei kiwei ba kin nang bteng ban ai ïa ka jingshakri kaba bha sha ki paidbah. Ka Dr. Ampareen ka la pynpaw ruh ba naka liang ka Sorkar Jylla kan don ryngkat bad ka Bethany outreach Hospital lada donkam ha kano kano kapor, hakaba ka la kyrpad ruh ban buh jingdwai na ka bynta ki nongïalam jong ka Sorkar khnang ba kin dang lah ban shakri kham bha shuh shuh naka bynta ban kyntiew ïaka jylla baroh kawei khamtam haka liang jong ka koit ka khiah.
