U Myntri Rangbah ka jylla u Conrad K Sangma uba long ruh u National President ka NPP, ha ka sngi Saitjaiñ ula pynbna paidbah ban pynieng da ka kurim ka jongu ka Mehtab Chandee ha ka elekshon shiteng samoi na Gambegre Constituency. Lah ban ong, ba kane ka jingpynbna u Conrad kala pynkut syndon ia ki khubor hamsaia kiba la saphriang baroh shi katta ba ka kurim ka jongu bad u hynmen u jongu kin iakhun ia katei ka elekshon.
U Myntri Rangbah ula ong, ba ka kurim ka jongu kam ju don bynta ha ka kam sain pyrthei bad ka ju kiar beit hynrei namar ka jingdawa ki paidbah ba ki kwah ia ka ba kan long ka nongmihkhmat jong ka Gambegre Constituency. U Conrad ula kular ba yn theh ia ki kam pynroi ha katei ka Constituency lada ka kurim ka jongu ka jop ia ka elekshon bad ula ong ba lada ka Mehtab Chandee ka jop ia ka elekshon kan iakynduh man ka sngi ia u Myntri Rangbah ka Jylla ban khmih ia ki jingeh jongka constituency bad kala dep ruh ban pynpaw ba ki don shibun ki kam pynroi kiba donkam ban leh hapoh ka Gambegre.
Kumban shu pynkynmaw ka shuki MLA ha Gambegre kala thylli noh kadei hadien ba u MLA kane ka Constituency u Saleng Sangma ula jop noh ia ka elekshon MP Lok Sabha na Tura Constituency bad kumta mynta ym hap ban pynlong noh ia ka elekshon shiteng samoi ban jied nongmihkhmat bathymmai.
