U District Magistrate ka East Khasi Hills u SC Sadhu ula pynjari ia ka kyndon 144 CrPC ha ka 4 tarik u Jylliew kaba dei ka sngi niew vote jong ka ilekshon MP Lok Sabha ban pynthikna ba ka jingniew vote kan long kaba iaid beit. Ha ka hukum kaba la pynmih da u SC Sadhu ula ong, ban pynneh ia ka suk ka saiñ bad ka jingiaid beit iaid ryntih ka jingniew vote kumta katkum ka bor kaba la pynkup katkum ka 144 CrPC la mana tyngeh ban iaid proseshon ne rally hapoh jong ka jaka kaba don ki jaka niew vote haduh ban da kut ka jingniew vote bad ban pynbna ia ka result.
Ha ka hukum la kdew ruh ba ka jingpyndonkam ia ki P.A. System/loudspeaker bad ka jinglehkmen da kano kano ka seng sain pyrthei ne kyrtong yn ym shah satia hapoh u pud u sam jong ka jaka niew vote bad la mana bad khang pyrshah ban rah ia ki siej kiba sieh ia ka lama ne khlem sieh lama, ki dieng, ki tiar meh ding, jingiaid proseshon ne ban ialang bun ngut hapoh u pud u sam jong ka 1Km na ka jaka niew vote. La mana tyngeh ruh ban pynbthei bom bad ban kawnag ia ki bom pataka ha ki surok bad ha ki jaka paidbah ha ka sngi niew vote bad la mana tyngeh ban iaid proseshon ne rally jingjop da uno uno u kyrtong ne seng sain pyrthei hadien ba la dep pynbna ia ka result hapoh jongka East Khasi Hills District.
U Sadhu ula pyntip ruh ba palat ia ka arngut yn ym shah ban synran ia u kyrtong uba jop ne uno uno uba la shah pynkupbor ban shimti iaka certificate election na u Returning Officer.Nalor kane la buh ruh ia ki kyndon hapoh ka jaka niew vote, ha kaba tang uwei u briew ryngkat bad ka ID/Car Pass kaba treikam kaba la ai da u District Election Officer, East Khasi Hills District, yn shah ban rung shapoh jong katei ka jaka bad ym shah ban rah ia ka Mobile Phone bad Camera ha ki jaka hapoh kaba niew vote. Kane ka hukum kan treikam mardor bad kan bteng ban treikam haduh ka 6 tarik u Jylliew 2024.
