Namar ka jinghuri hura ha ri Bangladesh khamtam haba ka Prime Minister ka Bangladesh ka Sheikh Hasina ka la hiar shuki noh bad ka la wan phet rieh sha ri India.Ka sorkar jylla hynne ka sngi ka la pynjari Korphiw miet ha kylleng ki khappud jong ka jylla Meghalaya bad ka ri Bangladesh naduh ka por 6 baje janmiet haduh 6 baje mynstep. Ia kane la pynbna da u Symbud Myntri Rangbah ka jylla u Bah Prestone Tynsong hadien ka jingialang bad ki heh BSF, Pulit bad ki heh ophisar ka jylla hynne ka sngi. Haba iakren bad ki nongthoh khubor u Bah Prestone ula ong, ba ka korphiw kan treikam ha baroh 444 Km ki thain khappud ka jylla Meghalaya-Bangladesh bad kan treikam ha ki jaka ba hap hapoh ka 200 meter ka jingjngai na u Zero Line bad ka ri Bangladesh. Ula ong kane ka korphiw kan treikam naduh mynta ka miet bad kan iai bteng beit katba ym pat pynbna da kumwei pat.
Ula kyrpad ia ki nongshongshnong ka Jylla khamtam kito kiba sah ha khappud ba kin iai shah bad ka Sorkar halor ka jingpynjari ia ka korphiw bad ban ai ia kino kino ki jingtip kaba ki ioh. “Ka jingpynjari ia ka Curfew ka dei hadien ba ka Prime Minister ka ri Bangladesh ka Sheikh Hasina ka la hiar shuki noh ne lah ban ong, ba ka sorkar ka la khyllem noh namar ka jinghuri hura ha ri Bangladesh. Ka jingpynjari korphiw ka dei kum shibynta ban tehlakam ba ki briew na ri Bangladesh kin ym ioh ban wan rungtuh shapoh Meghalaya” ong u Bah Prestone. Ula iathuh ki shipai BSF kin sa peit bniah ia ki thain̈ khappud bad ki la don 9 Batallion ki BSF ban pahara ha ki thain khappud ka jylla Meghalaya bad kin iatreilang ruh bad ki bor synshar shnong bad ki bor sorkar.
U Bah Prestone ula iathuh ruh ba tnad Kam Pohiing ka ri, ka la kular ban nang phah shuh shuh ia ki bor pahara naba ka jinglong jingman kam long kaba itynnad bad ka sorkar jylla ka la bthah ruh ia u DIG ban ai jingtip ia ka Sorkar Jylla lada ki donkam briew lane kano kano ka jingdonkam na ka Sorkar jylla. U Symbud Myntri Rangbah ula ong, ka Sorkar Jylla kan pyntreikam pura bad kan pyrkhing bha ia ka Foreigners Act, ha kaba kan pynphai ne pynngat ia ki bar ri kiba wan rung be-ain shapoh ka ri India katkum ki kyndon aiñ.
