Pynjlan rta ka sorkar 32 snem ban thep kam sorkar, ha ka kam pulit 18-21 snem

U Myntri Rangbah ka Jylla u Conrad K Sangma ula ong, ba ka jingpynrit ia ka rta thungkam hapoh 4 tylli ki tnat, ka dei namar ka jingdonkam kine ki tnat treikam ban ioh ia ki nongtrei thymmai kiba don ka met ka phad ba koit ka khiah. Haba jubab halor ka mat ban iatai ha ka Short Duration ba la wanrah da u MLA ka VPP na Mawlai u Bah Brightstarwell Marbaniang hapoh ka ïing dorbar u Conrad u la pyntip ba ki 4 tylli ki tnat kata ha Home (Police), Excise Registration Taxation and Stamp, Home Guard and Civil Defense, Prison bad Forest Environment ki la kyrpad ia ka Sorkar Jylla ban ym pynjlan ia ka rta thep kam.“Na ka bynta baroh ki tnat treikam Sorkar Jylla, ia ka snem thep kam la pynjlan na 27 sha 32 snem ban ai lad ia ki paidbah ban thep kam. Hynrei na ka bynta ki 4 tylli ki tnat treikam kata ha Home (Police), Excise Registration Taxation and Stamp, Home Guard and Civil Defense, Prison bad Forest Environment, ia ka rta snem thepkam la pynneh kumjuh kata naduh 18 haduh 21 snem.

U Conrad u la ong, ba ka kam kum Inspector of Excise, Forest Guard, Officer Pulit bad kiwei kiwei ha kine 4 tylli ki tnat, ka donkam da ki briew ki ban pyndep ia ka Physical Test namar ka jingdonkam ha kine ki kam. Ha shuwa kane u MLA ka Congress na Gambegre u Saleng A Sangma u la ai jingmut ba ka Sorkar Meghalaya ka dei ban bud nuksa na ka Sorkar Assam ban ai lad da ka Voluntary Retirement (phah shongthait) ne weng kam ia kino kino ki Pulit ki bym don ka met ba koit ba khiah bad kiba la rangbah ka rta.U Saleng u la ong ba ka jingsdang thep kam hapoh ka Jylla ka long 18 haduh 21 snem bad ki dang don bun samla riewlum ka Jylla kiba sdang ban leit skul slem rta.

“Lada ka snem thep kam ka kut tang 21 snem, kane kan pynduh noh ia ka hok ki samla trai riewlum khamtam kito kiba ap khmih lynti bad kiba thrang shisha ban thepkam ha kine 4 tylli ki tnat treikam ka Sorkar Jylla” la ong u Saleng. U Saleng ula ai jingmut ia ka Sorkar ba kam dei ban pyrkhat sani bha ia ka jingbuh rta ban thepkam bad ka dei ban peit katkum ka jingdonkam ki samla trai Ri ym namar ka jingdonkam ki tnat Sorkar.Haba jubab ia kane u Myntri Rangbah u la ong, ba kam ia hap ban beh kam ne phah shongthait ia ki nongtrei tang namar ba kim don ka met kaba koit ba khiah lane heh rta. “Ka Sorkar ka dang pynkhreh ban buh da ki jaka kilan met (Gym) ha baroh ki Police Headquarter bad ha ki Police Station jong baroh ki District na ka bynta ban plie lad ia ki Pulit ban don ka mat kaba koit ba khiah” u la ong.