Pynkha shnat treikam ka HYC sa ha Umwai

Ka HYC Sengkmie kala ioh ban pynkha biang sa ia kawei ka shnat treikam ha ka Shnong Umwai ka “HYC-Umwai Unit” kaba hap ha ka Elaka Mawlong Sirdarship. Ia kane ka jingialang la pynlong ha iing Dorbar Shnong Umwai da ka jingiadon ryngkat lang u Sordar ka Shnong Umwai, ki nongkitkam jong ka Hima Mawlong bad ki nongkitkam ka HYC Sengkmie ba kynthup ia u President Bah Roykupar Synrem, Samla Francis.G Mawlong u Vice President HYC Sengkmie bad Samla Isaac W Basaiawmoit u Secretary ka HYC- Sengkmie. Ia ka jingialang la pyniaid da u samla Isaac. W Basaiawmoit bad la ioh ia ka jingkren na u Bah Tyngshain Wanwar u Sordar ka Shnong Umwai  bad na u Bah Hes Ryngkhlem u Executive Member ka Hima Mawlong kiba la ai ia ki kyntien kyntu kynpham bad kitbok-kitrwiang ia ka Seng.

U Bah Roykupar Synrem ula pyntiansmai ia ki dkhot nongkitkam bathymmai kane ka Shnat treikam. Haba ai jingkren u Bah Roykupar ula pynshai ia ki mat treikam jong ka Seng bad ha ka jingiaid lynti naduh ba la seng ia ka haduh kine ki sngi kiba mynta ha ka jingkynjoh ia ka jingdap ba Shiphew Snem ka jong ka seng. Ula kren shaphang ka jinglong bakyrpang jong ka jaidbynriew bad ula kyntu ba kum ka jaidbynriew bad kum ka Seng kaba dang ia ksaid ban pynim ia la ki jong ki Riti ki Dustur ha ka shim jait bad ka khein kur khein kha, ha ka rukom bat khyndew bad ha ka jingbat ia u lakam synshar ba kadei ka kamram bad ka jingkitkhlieh ba kane ka pateng kaba mynta, ba ngin nang iai pynim, iai bud bad ban iada iaki snap ba kyrpang ki jong ka.

U Bah Roy ula kyntu ruh ia ki dkhot ka Umwai Unit ba kin long kiba peitngor na ka jingioh lad ban wan buhai shnong da kiwei pat ki jaidbynriew kiba nabar kiba la jyllei ha kane ka jaidbynriew kaba buh jingma pat ia ka jaidbynriew hi baroh kawei bad ula kdew ruh ia ka jingdonkam ia ka jingiatreilang jong ka seng bad ki Dorbar Shnong-Dorbar Hima ha kaban peit ia ka bit – ka biang bad ia ki jingsniew jingma jong ka dong ka Thain bad ka jaidbynriew hi baroh kawei. Ki Nongkitkam ba hakhmat jong ka HYC Umwai Unit ki kynthup ia u Samla Khrawkupar Wanwar kum u President, u Samla Readystar Sohkhlet kum u General Secretary bad 25 ngut ki dkhot nongkitkam. Kane ka long katkum ka kyrwoh khubor na u Bah Francis.G Mawlong.