U MLA ka South Shillong u Bah Sanbor Shullai ula ong, ka dei ka kamram ki MLA ba kin iarap ia ki paidbah khamtam ia u duk u suk ha ka por ba ki shem jynjar bad ia katei ki lah ban leh da kaba pynlut na ka Discretionary Grant ba T.10 lak. Haba ia kren bad ki nongpathai khubor, u Bah Sanbor ula ong, ka jingthmu ban ai ia ka Discretionary Grant sha ki MLA ka long ba kin ai jingiarap ia ki paidbah ba ki mad ka jingeh. Ula iathuh ba kum u MLA ka South Shillong ula ai jingiarap ia ki paidbah kiba shem jingeh lyngba ka Discretionary Grant. Ula ong, ba lada jia ryngkhat lada uno uno u nongbylla u khlad noh da kaba shah tynrah ha ka kali ha ka jingthmu ban leit bylla bad ka kurim jongu kam don pisa tang ban pyndep ia kaba sah kim don pisa kumta ia kum kiba jia kumne lah ban ai jingiarap lyngba ka Discretinary Grant bad wat ha ka por bas dang skul don ki longing kiba bym lah ban kyrshan ia ki khun ba kin leitskul kumta kum u MLA ula iarap ia kid a katei ka Grant kaba ka sorkar ka ai T.10 Lak ha ka shi snem. Haba kylli ba don ki katto katne ki MLA kiba khang ia ki jingkhang ki jongki bad kim lah ban ai jingiarap ia ki paidbah, u Bah Sanbor ula ong, “Kumno kim lah ban ai jingiarap ia ki paidbah, ki MLA kim lah ban ong kumta, haba ia kane la ong ba la ai ia baroh 60 ngut ki MLA. Kumno ki MLA mynta ki khang ia ka jingkhang ban ong ba kim lah ban ai jingiarap, haba ia kane ka pisa la ong shai ha ki kyndon treikam ba ka Discretionary Grant kadei na ka bynta ki paidbah, ym dei ba la ong ba ka Discretionary Grant kaba la ai T.10 lak kadei naka bynta u Bah Sanbor yn thep hapoh pla, ba ka Tnga bad ki khun kin leh sngewbha, kadei ban ai ia u paidbah, ka kyndon jingbthah ka long ban ai na ka bynta ki jingjia ba sngewsih, ia kiba duk ba suk ha la ki jong ki jong ki constituency”.
“Baroh 60 ngut ki MLA ki ioh bad kim lah ban ong ba kim lah ban ai jingiarap bym don kata ka jingiarap. Phim lah ban ong kumtei, phim lah ban pyndonkam bakla ia ka pisa kaba la mang ban ai ia ki duk ki suk bad jong ki paidbah ioh ka kyrtoh kylla” ong u Bah Sanbor.Ula ong, “Ha ka por khangdam ba wan saphriang ka khlam COVID-19 ka sorkar pdeng kala T.400 Klur duna ia ka pisa ban ai jingiarap ia ki longiing da ka bam ka dih kane katai, ka ai khnang. Kum ia kato ka pisa baroh kam long ka pop ba phin ia bam. Ka pisa kaba dei ban ai ia u paidbah pha ia thep sha pla lajong. Ia kane la ai ha ki MLA ba kin leit theh jingiarap kum ia kine ki jingjia kiba sngewsih ha la ki constituency, phin ong ym don ka mut phin hap ban leit peit khnang keiñ mano ba shim”. “Lada ong ba ym don, wat shim keiñ ia ka pisa bad ai da ka jingthoh ba la pynphai noh ba ngam pyndonkam ia katei ka pisa T.10 Lak ha ka constituency jong nga” la bynrap u Bah Sanbor.
Ula iathuh ba ha ka por ba u dang long MLA nyngkong ha u snem 2008, ka song pisa jong ka Discretionary Grant ka dang dei tang T.3 lak bad hadien la pynkiew sha ka T.5 lak bad mynta ka la kiew sha ka T.10 lak shisnem. U Bah Sanbor ula iathuh ba dang shen ha ka jingialang bad u Lamphang ha ka jingiadonlang u Myntri Rangbah bad Symbud Myntri Rangbah, ki la ai jingmut ban pynkiew noh sha ka T.20 lak naduh u 2025 bad hadien ba ka sorkar jylla ka la ai jingmynjur kumta ki MLA naduh u snem ban wan kin ioh noh T.20 Lak. Ula ong, baroh ki MLA ki hap ban aiti ia ki Utilization Certificate ha ryngkat ki Bill khnang ba kin ioh ia ka song pisa bad ka shong ha man la ki MLA kumno ki pyndonkam ia kane song tyngka ban ai jingiarap ia ki paidbah hapoh ne shabar jong ka constituency ruh.
