Pynksan u MR ka jingpynkylla Meghalaya Lokayukta Act ha u 2021 ban treikam pura

U Myntri Rangbah ka Jylla u Conrad K Sangma ula pynksan ba ka Sorkar ka la wanrah jingkylla ha ka Meghalaya Lokayukta Act ha u snem 2021 ban pynlong ia ka, kaba treikam pura. Ia kane u Conrad ula pynksan haba jubab iaka Resolution bala wanrah da u MLA ka VPP na North Shillong U Bah Adelbert Nongrum. U Conrad u la ong ba ka Lokayukta hapoh ka Meghalaya Lokayukta Act, 2014 khlem ka jingdon ka Amendment ha u snem 2021 kam shym la lah ban treikam namar kane ka ain 2012 ka donkam khyndiat eh u Chairperson bad 4 ngut ki dkhot ia kaba sanphew naka shispah ki dei na ka Judicial. “Ka amendment jong ka Meghalaya Lokayukta Act 2014 bala mynjur da ka ïingdorbar ha u snem 2021 kala pynkylla ia ka kyndon 3 da kaba bujli ia ka kyntien “and” da ka “or” ha ka clause (a) jong ka sub-section 2. Kane ka amendment ka kynjoh ia ka jingthmu ban pynlong ia ka Lokayukta kaba treikam”ula ong haba bynrap “Ka amendment u snem 2021 ka dei kaba la lah ban pyndap ia ki jingduna ha ka Meghalaya Lokayukta act 2014” la ong u Conrad. U Conrad u la ong ba kine ki jingpynkylla ki dei kiba donkam bha ha katei ka por namar kala don ka jingtynjuh ia ka rai bala pynmih da u Chairperson barim ka Lokayukta kata u Justice PK Musahari, Judge (Retd) ka Guwahati High Court ha ka ïingkashari Meghalaya High Court lyngba ka Writ Petition (C) No 421/2020. Ha katei ka por, dang thung tang u Chairman ka Lokayukta.

U la ong “Ka Division Bench jong ka Meghalaya High Court lyngba ka hukum ba 16 tarik Rymphang, 2021 kala pan ia ka jubab na ka Sorkar Jylla da kaba ong “Da kaba thung tang ia u Judge bala shongthait kum u Chairperson ka Meghalaya Lokayukta kam pat biang satia ban niew kum ka tnad kaba biang bad treikam pura haba khmih ia ka kyndon 3 jong ka Meghalaya Lokayukta Act, 2014”. U Myntri Rangbah u iathuh ba ka Sorkar Jylla kala shong bishar ia ka Lokayukta Act jong kiwei ki Jylla bad shem ba ha kiwei ki Jylla kum ka Sikkim, Haryana, Jharkhand, Himachap Pradesh, Tripura bad kiwei kiwei, ka Lokayukta ka dei ka tnad ba treikam tang uwei u dkhot. Kumta la wanrah ia ka jingpynkylla ha u snem 2021 ban pynlong ia ka Lokayukta kaba treikam bad la bujli noh ia ka kynron “and” da ka “or”. Ula ong ba ia kane ka kyndon ba pynkylla thymmai la rah hakhmat ka Division Bench jong ka Meghalaya High Court kaba shong bishar ia ka mukotduma bad ia kane ka amendment la shem da ka Iingkashari bad pynksan ba ka Meghalaya Lokayukta kala long kaba treikam pura.

U Conrad u la ong ba ka Meghalaya Lokayukta kala treikam pura mynta hapoh une u Chairperson ba mynta uba la shimti ia ka kam ha ka 1 tarik 2022 bad ia u Secretary uba bat ia ka kyrdan secretary ha ka Sorkar Meghalaya la thung pat da u Chairperson halor ka jingphah kyrteng jong ka Sorkar Jylla kat kum ka kyndon 10 (2) jong ka Act. Nalor kane, ia ka inquiry wing jong ka Meghalaya Lokayukta ruh la dep ban thung hapoh ka kyndon 11 jong ka Act ia kaba la khlieh da u Director of Inquiry uba bat ym poh ia ka kyrdan jong u Additional Secretary ka Sorkar Jylla bad la thung ruh ia u Director of Prosecution bad kumjuh ruh ia ki Ophisar jong ka Inquiry wing. U la pyntip ba ki Case bala Register bad ka Lokayukta haduh mynta ki log 38 tylli ha kaba 27 tylli ki case lah dep ban pyndep kynthup kito kiba la dep Chargesheet bad 11 tylli ki Case ki dei kiba dang sahteng.