Pynksan u Ronnie ïa ka rai pynjlan samoi treikam ka KHADC-JHADC

U Nongialam ka Liangpyrshah hapoh ka ïing dorabr thawain u Bah Ronnie V Lyngdoh u badei ruh u MLA bad MDC ka Mylliem ula pynksan iaka rai jong ka Sorkar Jylla ban pynjlan iaka samoi treikam jong ka Khasi Hills Autonomous District Council (KHADC) bad Jaintia Hills Autonomous District Council (JHADC) sa 6 bnai.
Haba pynksan ia kane, u Bah Ronnie ula ong “Nga sngew ba kala don palat lane ym duna iaka 30 snem ba kam don ka Delimitation lane ka jingpynbeit iaki constituency jong ki MDC ha kine ki District Council”.
Haba ai nuksa iaka jingiapher ka jingdon briew ha ki Constituency u Bah Ronnie ula ong “Phi lah ban iohi ba ki don ki Constituency kiba bun ki nongthep Vote bad don pat ki Constituency kiba duna bha ka jingdon ki nongthep Vote. Ka nuksa ka long ka Laban kaba don 12,000, ka Mawlai pat 50,0000 bad ka Mylliem 36,000”.
“Namar kane ngi la ai jingmut iaka Delimitation, balei ym lah ban don ki juh ki Constituency naka bynta ki MLA bad MDC naka bynta ban pyntyllun beit iaki kam ki jam lyngba ka jingiareilang hapdeng ki MLA bad MDC” la ong u Bah Ronnie.
U Bah Ronnie ula iathuh ba ki don ki rangbah na Lumparing kiba la iathuh ba, MLA ki hap ha Laban hynrei MDC ki hap ha Laitumkhrah.
“Ka Laitumkhrah MDC Constituency ka treikam naduh Lumparing shaduh Siejliej, kumno kane ia iahap. Naka bynta ki kam MDC ki briew na Lumparing ki hap iaid lyngba ki 4 tylli ki MLA constituency ba kynthup Laban, Laitumkhrah, Mawryngkneng bad Pynthorumkhrah. Ka lah biang palat ka por ban pynlong lang hajuh ki Constituency naka bynta MLA bad MDC” ula ong.
Haba iadei bad ka jingkam ba Voice of the People Party (VPP) baka jingpynjlan kadei namar ka Sorkar ka sheptieng, u Bah Ronnie ula ong “Kam dei ka sien ba nyngkong bala pynjlan iaka samoi treikam ki District Council kum ha GHADC bad kane kam mut baka Sorkar ka tieng. Lada ym lah ban pynlong ilekshon mynta, lashai te hap pynlong beit. Kam mih ka jingkylli baka Sorkar ka tieng”.