Ka President jong ka Ri India, Droupadi Murmu ka la sam ia ki khusnam National Florence Nightingale Awards na ka bynta u snem 2024 sha ki nurse ha ka jingialang ba la pynlong ha Rashtrapati Bhavan mynta ka sngi. 15 ngut ki nurse ki la ioh ia kane ka khusnam kum ka jingithuh ia ka jingtrei shitom jong ki bad ka jingai jingshakri ia ka imlang sahlang.U Myntri Sorkar Pdeng ba dei khmih ia ka tnad Health and Family Welfare, Jagat Prakash Nadda, Myntri Khynnah ka tnad Health and Family Welfare Anupriya Patel bad kiwei kiwei ki kynrem ki lyndan ki la iadon lang ha kane ka sngi. Ha ka jingkitbok kitrwiang ia ki nongjop, u J P Nadda u la ong ba kane ka khusnam kan ai mynsiem ia ki ba kin dang iaitrei shitom na ka bynta ka imlang sahlang. U la ong ruh ba ki nurse ki long kum u budlum jong ka kam ai jingsumar. La sdang ban ai ia ka khusnam National Florence Nightingale Award da ka tnad Health and Family Welfare, jong ka Sorkar India ha u snem 1973 kum ka jingithuh ia ka jingtrei shitom jong ki nurse ha ka imlang sahlang.
La sam 15 tylli ki khusnam ha ka thup Registered Auxiliary Nurses & Midwife, Registered Nurses and Midwife bad Registered Lady Visitor. Ia kane ka khusnam la ai ia ki nurse kiba trei ha ki kam Sorkar Pdeng, Sorkar Jylla / UT bad ki kynhun trei mon sngewbha. Ki nurse kiba trei ha ki hospital lane ha ka imlang sahlang ki lah ban ioh ia kane ka khusnam. Kane ka khusnam ka kynthup ia ka syrnot, ka song tyngka kaba T. 1,00,000/- bad u medal. Ki nurse ba la ioh khusnam ki long ka Sheela Mondal na Andaman & Nicobar Islands, Iken Lollen na Arunachal Pradesh, Vidjeyacoumary V Puducherry, Ms Januka Pandey Sikkim, Ms Anindita Pramanik West Bengal, Ms Brahmacharimayum Amusana Devi Manipur, Major Gen Ignatius Delos Flora Delhi, Ms Prem Rose Suri Delhi, Dr Tabasum Irshad Handoo Jammu & Kashmir, Dr Nagarajaiah Karnataka, Ms Shamshad Beegum A Lakshadweep, Ms Asha Womanrao Bawane Maharashtra, Ms H Mankimi Mizoram, Ms Sanjunta Sethi Odisha bad Radhey Lal Sharma na Rajasthan.
Ki nurse ki long kum u budlum jong ka kam ai jingsumar. Ka Sorkar India, hapoh jong ka jingialam jong u Myntri Rangbah Duh, Narendra Modi ka la shim ia ki sienjam ban kyntiew ia ka jingpule nurse bad midwifery. Ki sienjam kiba heh na ka bynta kane ki kynthup ka jinseng 157 tylli ki kolej nursing ha ki jaka ba don ki medical college bad ka jingsdang ia ka National Nursing and Midwifery Commission ban pynkylla ia ki jinghikai nursing bad ki rukom trei ki ban wanrah ia ka jingkiew ka kam ai jingsumar ha baroh kawei ka ri.
