Ha ka jingiakynduh lang jong ki volunteers ka Kyrmen Foundation batip kum ka 2nd Volunteer Meet 2024 felicitation & Gratitude, kaba la pynlong ha Heaven Cove Syntu Ksiar Jowai ha ka sngi saitjaiñ 19 tarik , ka Kyrmen Foundation ka la pynkup burom ia 3 ngut ki Volunteers jong ka kiba la iarap ia ka imlang sahlang ban pyllait im ia ki mynsiem briew lyngba ka snam ba ki la ai sngewbha. Kine ki 3 ngut bala mih bha shakhmat ban ai snam sngewbha shaki briew ba donkam jingiarap ha kano kano ka por dei u Yoohimi Khynriem, ka Janta Dkhar bad u Augustine Phawa. Ha kane ka sngi la wan sakhi lang u Kyrmen Shylla MLA Khliehriat uba dei ruh u myntri ka sorkar Jylla, u Lasky Rymbai MDC ka Tuber uba dei ruh u Dy CEM ka JHADC, bad kiwei ba shah khot sngewbha. U Lasky Rymbai haba kren ula iaroh iaka jingiaid lynti ka Kyrmen Foundation naba hapoh ki saw snem kala leh shibun ki kam iaka imlang sahlang, bad ula pynkynmaw ruh iaki kam ba bha bala leh ka Kyrmen Foundation haki snem bala leit khamtam haka por ba don ka khlam COVID.
Na ka liang u Kyrmen Shylla haba kren kum u kongsan u ong, haba don jingeh hap wad lad hi kumno ban pynjem iaki jingeh, kumta halor kane ka nongrim la sdang ruh iaka Kyrmen Foundation, kata dei haka por ba wan ka klam COVID naka daw ba ki iohi iaki jingeh u paidbah, khlem da phet krad naki jingeh ki wad lad kumno ban pynjem iaki jingeh jingjynjar u paidbah. U ong ruh ba haka jingim briew baroh hap mad jingeh la ha ïing ha sem, tangba dei ban wad lad kumno ban pynjem khang ban hun ka mynsiem. U iaroh ruh iaka Kyrmen Foundation ba kane ka sngi kala long ka jingsarong iaki volunteer jong ka ba kila lah ban leh kaba bha tam iaka imlang sahlang .
Kumta u kyntu ba haba iarap ia kiwei dei ban pyni ruh ka dur khmat ba kmen, khnang ba ki briew ba pdiang ruh kin kmen bad sngewsuk. Bad haba iarap ia kiwei u kyntu wymdei ban khmih lynti ei ei kylla pat naki, hynrei ki jingkyrkhu kin wan hi ha kano kano ka por bym poi pyrkhat haki rukom bapher bapher. Ha ka jingialang ba pyniaid da u Ripos Lyngdoh la ioh ka jingkren pdiang naka Simi Khongthiang Secretary Kyrmen Foundation, ki kyntien ai khublei naka Aiti M.Mawlong bad kiwei.
