Ka National Institute of Technology Meghalaya ka la pynlong ia ka convocation ba 11 hynne ka sng saitjain ha State Convention Centre, Shillong bad wer ia ki samla wan pule ban pynurlong ia ka jingangnud ha ka jingim ban trei ha ki kam bapher bapher katkum ka juk mynta. Ha kane ka sngi u Suvamoy Saha, Managing Director ka Eveready Industries India Ltd u long u Kongsan bad u Prof. Avinash Kumar Agarwal, Director, Indian Institute of Technology Jodhpur bad Maj Gen Rajesh Kumar Jha (Retd.), Director (Personnel), NEEPCO Ltd kum ki symbud kongsan. Ia ka jingialang la pyniaid da u Chairman ka Board of Governors jong ka NIT Meghalaya, u Sunil Alagh. U Director ka NIT Meghalaya, u Prof Pinakeshwar Mahanta ula pynsngew ia ka kaiphod treikam halor ka ki jingjop ka NIT Meghalaya ha kine ki shisnem ba la dep. Ula ong wat hapdeng bun ki jingeh ka NIT Meghalaya ka la ïai bteng ban leh bha ha ka pule puthi bad ha ka jingwad bniah. Ha u snem 2024, kane ka jaka pule ka la ioh ia ka kyrdan kaba 68 ha ka thup 100 tylli ki jaka pule engineering ha ka NIRF ban kiew saw kyrdan na ka kyrdan 72 ha u snem 2023. Katba ha ka Expo-2024 ha u bnai Naitung, ka NIT Meghalaya ka la ioh ia ka khusnam banyngkong ha k pule puthi. Ula iathuh ha ka 18 tarik u Risaw, ka FICCI ka la pynbna ban ai ïa ka khusnam ia ka NIT Meghalaya na ka bynta ka “Ka jingtbit ban thaw kam thaw jam.”
U la ban jur halor ka jingpyntreikam ïa ka National Education Policy (NEP) 2020 ka long ka sienjam ban pynkylla ïa ka NIT Meghalaya. Ha ka samoi pule 2024-25 ki don bun ki jingioh myntoi ki samla pule ha ki kyrdan pule bad ki kam ïalehkai Yoga, NCC, NSS bad kiwei na bynta ka jingkoit jingkhiah ha ka bor pyrkhat. U chairman u Sunil Alagh ula ban jur halor ka jingdonkam ban pynpaw pyrthei ia ki karkhana. U la ong ba ha ka pyrthei mynta ka jingjop kam lah ban long kaba shu jia ryngkhat. Ka jia namar ka jingiaishah, ka jingtrei shitom bad ka jingaiti lut. U la pynksan ruh ia ka jinglong ba janai, ka jinglong shlur bad ka jinglong sting kaba bha kum ki bor kiba pynlong ia ka jingjop. U la kitbok kitrwiang ba kin nang bun ki kynthei kiba shim ia ka kam Engineering bad ban buh ia ka dak ha ka pyrthei jong ka teknoloji. U Professor Avinash Kumar Agarwal, Director ka IIT Jodhpur u la ai khublei ïa ki samla kiba la ïoh ïa ka degree bad kitbok kitrwiang ïa ki ba kin nangjop ha ka jingim jong ki. U la kynthoh ba ka kyrdan pule ka dei tang ka jingsdang bad ka pyrthei ka plie tang ynda lah ban jop ïa ki jingeh ba shisha, la ka long ha ka kam karkhana, ha ka pule puthi ne ha ka jingim ba shisha.
U Major General ba la shongthait u Rajesh Kumar Jha ula kyrpad ïa ki samla pule ba kin long kiba la pynkhreh na ka bynta ka lawei, ban thaw ïa ka jinglong ba kyrpang, ban pdiang ïa ka roi ka par kaba neh bad ban ithuh ïa ka jinglah ban pynkylla dur jong ki jingpynmih thymmai ha ka liang ka teknoloji. U kongsan ha katei ka sngi, u Suvamay Saha, u la kyrpad ia ki samla pule ba kin pynkhreh ialade ban trei ia ha kino kino ki kam ha kompani kaba shu mutdur ha ki samla pule. U la kyrpad ia ki samla pule ban sngewthuh ia ki jingdonkam ki jingeh ban lait na ki jinglong ba sniew ha ka jingim. Ha kane ka sngi la pynkup burom ia ki 193 ngut ki samla pule, kynthup 140 ngut ki B. Tech, 9 ngut ki M. Tech, 23 ngut ki M. Sc bad 21 ngut ki PhD. Ïa ki takma ksiar jong ka Institutional na ka bynta ka jingtbit ha ka pule puthi la sam sha u Aniket Kumar ha ka B.Tech, u Abhay Verma ha ka M.Tech bad ka Meenakshi Theertha ha ka M.Sc . Ïa ka takma ksiar jong u President la ai sha ki samla pule ba tbit tam na ka bynta ka jingtbit ha baroh ki tnad bad ki prokram, kumba la ïoh da u Kumar Gaurav, B.Tech (Civil Engineering). Ïa ka takma ksiar ka Chairperson na ka bynta ka kynthei ba la pyndep ïa ka jingpule (B.Tech) ba la leh bha la sam sha ka Divyasree Dev, B.Tech, Computer Science Engineering.
