Ka National People’s Party Jirang Block Committee lyngba ka jingkitkhlieh ruh da u MLA ka Jirang Konstituensi u Bah Sosthenes Sohtun, ki la nang bteng ban ai mynsiem bad pynshlur ia ki samla pule ka dong ka thaiñ khamtam kito kiba la pass bha ha ka eksam SSLC da kaba pynkup burom ia ki 74 ngut ki samla pule ha ka prokram kaba la long hapoh ka auditorium hall jong ka CTI, 12 Mer. Ha kane ka sngi pynkup burom, nalor u Bah Sosthenes Sohtun, MLA la ia donlang ruh u Bah Victor Rani, MDC ka Jirang Konstituensi, u Deputy Commissioner ka Ri Bhoi District u Abhilash Baranwal, Ki Principal, Headmaster bad Headmistress na kylleng ki skul lem bad ki samla pule kiba la shah pynkup burom.
Napdeng kiba shah pynkup burom, la ithuh kyrpang ruh ia ka jinglah ban wan shakhmat jong u Khrisna Koirala, na ka Little Star Higher Secondary School u la ioh haduh 91.16%, nangta ia ka Ruphimon Makri class 9 na ka Mt. Zion Academy kaba la shah jied ban mihkhmat ia ka Ri Bhoi District ha ka Prepana Programme kaba la long ha Gujarat bad ia u Johny Nongrum u la khur ia ka takma ksiar ha ka jingiakhun ia ka muaythai world championships kaba la long ha Indonesia.
Haba kren ha kane ka sngi, na ka liang ki nongkren naduh u MLA bad DC ki la pynpaw ia ka jingkmen ban sakhi bad ka thaiñ Jirang Block ka la nang kiew ha ka Liang ka pule ka puthi na ka jingnang mih ki samla pule kiba pass bha ha kine ki snem ba la leit noh da kaba ki la ai jingkitbok kitrwiang ruh ia ki samla pule ba kin nang iai treishitom ban pynphyrnai ia ka lawei jong ki.
“Ka jingnang jingstad ka long kaba kordor tam bad ka dei ka spah Bah ka bym lah ban tuh noh da mano re mano, hynrei ka dei hi ka jingminot bad ka rai kaba skhem jong u ne ka samla pule ba kin angnud ban leh bha ha ki eksam bapher bapher ban poi sha ka thong kaba ki thmu”, ong u DC da kaba bynrap ruh, ba ka Eksam SSLC ka dei ka eksam kaba nyngkong eh bad kaba kham kongsan na bynta ki samla pule bad ki dei ban don ka thong ban poi ne jop sha ki eksam kiba kham heh ha ka ryta ka jong ki.
