Ka National Peoples’ Women Front (NPWF) kaba dei ka seng ki kynthei jong ka NPP, hynne ka sngi ka la leit ban iakynduh ban ai khublei ia ka sorkar jylla bad ia u Symbud Myntri Rangbah ka jylla u Bah Prestone Tynsong uba dei ruh u Myntri Kam Pohiing, halor ka jingthung ia ka Kong Idashisha Nongrang kum ka Longkmie ban shimti ia ka kam kum ka Director General of Police (DGP) ka jylla. Ka NPWF hapoh ka jingialam ka President ka Dr Jasmine Lyngdoh kila pynpaw ka jingsngewnguh bad kila pynkup burom ia u Bah Prestone Tynsong halor ka jingthung ia ka Kong Nongrang kum ka DGP ka jylla.
Haba iakren bad ki nongthoh khubor, ka Kong Jasmine kala ong “Ngi wan ban pynpaw ia ka jingsngewnguh ia u Symbud Myntri Rangbah ka jylla uba khmih ia ka tnad pohiing uba la thung ia ka Kong Idashisha kum ka longkmie DGP banyngkong ka Meghalaya, kaba dei ka kyrdan kaba kongsan bad ngi lah iohi ruh ba kane ka sorkar kadei kaba ai ia kiba bun ki kabu ia ki kynthei jong ngi ban pyni ia ka jingtbit ka jongki bad ia ka mynsiem jong ka jingtrei shitom bad ka jingshngain ia ki kynthei”. “Ngi dap da ka jingkmen ba ka sorkar kala shim ia ki sienjam kiba khlain bad iohi ia ka jinglah jong ki longkmie, kiba long ki nongialam kiba tbit bad kiba lah ban ai ka jingshakri kaba bha tam” ong ka Dr Jasmine.
Ka la pynpaw ruh iaka jingsngewtynnad ba ka Kong Idashisha kala pynbna ban sdang ia ki kam ban wanrah ia ki jingkylla ha ka Meghalaya Police bad ban iakynduh ruh ia ki paidbah bad kan phaikhmat bha na ka bynta ka shongsuk bad shongshngain ki kynthei bad kine ki long kiei kiei kaba ka NPWF ka da sngewkmen ba kin urlong.Ka nongialam ka NPWF kala pynpaw ruh ba ka ngeit skhem ba ka DGP ba thymmai ka jylla, kan shimkhia ha kaban pynthikna ia ka jingshngain jong ki kynthei ha ka jylla bad kan pynthikna ba kiba leh ia ki kam sniew kin shah kem mardor bad kan ai ia ka jingshakri kaba bha tam ha ka jylla.la ioh jngtip ruh ba ka NPWF kan leit ruh ban iakynduh ia ka DGP bathymmai ka jylla ha kaba kane ka seng kan pynkup burom ruh ia ka Kong I Nongrang kum ka Longkmie kaba nyngkongeh ha ka jylla ban shimti iaka kam DGP ha ka jylla.
