Sa shisien pat ki nongialam ka Ri Bhoi Youth Federation (RBYF) Sengkmie lyngba ka Education Cell ka la sam ia ki khusnam sha ki khun samla kiba la pass bha ha ka eksam SSLC bad HSSLC 2024, kynthup ruh ka jingpynkup burom ia 3 tylli ki skul kiba la lehkai bha ha ka International Subroto Cup bad ia 2 ngut ki riew rangbah ba la wanrah nam ia ka Ri Bhoi District. Ia kane ka prokram kaba la pynlong ha ophis treikam ka RBYF, ha Saiden la wan ban shimbynta da u Bah M. Marbaniang, Director ka MBOSE kum u kongsan, u Bah Raju Rijal, SDSEO ka Ri Bhoi District, u Bah Rayonald Kharkamni, President ka RBDCA, u Bah Everlasting Pyngrope, principal ka Mynken Christian Higher Secondary School, u Bah Bipul Thangkhiew, President rangbah ka RBYF, u Bah Bullet Marbaniang, General Secretary, ki nongialam bad ki dkhot ka CEC, ki circle bad ki unit bapher bapher. Ka RBYF ka la sam da ki momentos bad pisa sha ki 15 ngut ki samla pule kiba la pass bha ha ka HSSLC bad 9 ngut ha ka SSLC, la pynkup burom ruh ia u Bah Everlasting Pyngrope u ba la ioh ia ka National Teachers’s Award, ia u Bah Rayonald Kharkamni, u ba la shah jied kum u match Observer na bynta ka jingialehkai test Kriket hapdeng ka ri India pyrshah ia ka New Zealand kaban sa long ha Mumbai.
Ki lai tylli ki skul kiba la shah pynkup burom ba mihkhmat ia ka jylla Meghalaya sha ka International Subroto Cup kiba kynthup ia ka Nongjri Presbyterian Higher Secondary School kaba la rah ia ka nam lahduh ha ka U-15 ha New Delhi, nangta ka Christian Higher Secondary school bad ka Mynken Christian Higher Secondary School. Haba kren ha kane ka sngi, u Bah Bipul Thangkhiew u la pynpaw, ba ka seng ka don ia ka thong ban kyntiew ia ka pule puthi hapoh ka district kumta ka iai ai mynsiem ia ki samla pule kiba wan shakhmat ha ki eksam bapher bapher bad ruh ka seng ka ju tynrong ruh ia ka jinglut jingsep jong ki katto katne ki samla pule kiba wan na ki longiing baduk da ki kynja scholarship bad kiwei kiwei bad dang shen ka seng ka la kyrshan ruh ia u wei u samla u ba la pyndep ia ka jingpule MBBS bad mynta u la long kum u MD ha kaban un sa shimti shen kum u MD ha kawei na ki hospital kaba long ruh ka jingai mynsiem shikatdei ia kane ka jingtreikam jong ka seng.
U la iathuh ruh, ba ka seng hadien ba la dep plie ia ka ophis jong ka, ki don ruh ia ka thong ban pynlong ia ki programme coaching na bynta ki samla pule kiba angnud ban iakhun ia ki competitive examinations kum ka NEET da kaba ia treilang ruh bad kawei ka kynhun kaba na New Delhi kaban long shisha ka jingmyntoi kaba khraw ia ki khun samla ka dong ka thaiñ Ri Bhoi District nalor kiwei kiwei ki kam ba ka seng hi ka ju shim ka jingkitkhlieh. Na ka liang u Bah M. Marbaniang Director ka MBOSE, u la ai ia ka jingiaroh ban sakhi ba ka RBYF ka la nang iai bteng ban ai mynsiem ia ki khun samla kiba la pass bha ha ki eksam bapher bapher, da kaba ong ruh, ba kane ka sienjam kan kyntiew shisha ia ka pule ka puthi ha kane ka district. “Ha kane ka juk ba mynta ngim lah shuh ban ia khun da ka bormet hynrei da ka jabieng da ka jingstat, kumta kum ki samla pule ki dei ban kheiñ kor bha ia ka jingpule ban ioh ia kata ka jingnang jingstad kaba kordor bad ban ioh ruh ia ka jingithuh kaba kyrpang ha ka lawei ka jong ki”, ong u Bah Marbaniang.
