Ki bor pyniaid ka Ri Bhoi College kawei na ki shlem ai jingnang jingstad kaba la rim bad paw hapoh ka Ri Bhoi District, mynta ka 9 tarik u Nailur ki la ioh ban rakhe ia ka lyngkhuh snem kaba 40 snem ka jingiaid lynti ban phriang ia ka jingnang jingstad hapoh ka district, bad lyngba kane ka jingrakhe la kynmaw burom kyrpang ruh da kaba ai burom ia u Principal ba nyngkong eh kane ka Kolej u Babu (L) R I Masharing. Kumba la pharia lyngba ki jingkren lamphang ha kane ka program rakhe ia u mawmer ba 40 snem ka jingiaid lynti ka Ri Bhoi College ban sam ia ka jingnang jingstad bad ban pynphyrnt ia ka lawei ki samla pule, ia kane ka Kolej la sdang nyngkong eh ha u snem 1984 bad dei naduh u tei u snem ba kum ka Kolej ka la shakri khlem kynran dien na ki jingeh kiba bun ba la mad da ki bor nongpyniaid jong kane ka Kolej hynrei ban ieng skhem beit traing ban pynkhlaiñ ia u jylli ka jingsam jingnang jingstad sha ki samla pule kane ka district Ri Bhoi. La wan ban ai mynsiem bad ban kitbok kitrwiang ia kane ka sngi kyrpang ka Ri Bhoi College, da u Bah Mayral Born Syiem, MLA ka Nongpoh Konstituensi kum u kongsan, ha ka jingiadonlang ruh u Principal ka Kolej u E.C Benny, u Bah RR Kynsai Makdoh, ki bahaiing hasem jong u Babu (L) R I Masharing, ki Professors, ki samla pule kane ka Kolej.
Haba kren kum u kongsan, u Bah Mayral Born Syiem, nyngkong eh u la ai khublei kyrpang ia kane ka shlem ai jingnang jingstad kaba la kham rim bha hapoh ka Ri Bhoi District kaba la kynjoh mynta sha u mawmer ba 40 snem ha ka jingshakri ban pynphyrnai ia ka pule puthi hapdeng ki samla pule ka district, ym lah ban len ba ka jinglen lade bad ka jingtreishitom jong ki nonghikai, ki nongtrei bad baroh kiba don ka bynta kaba khraw ba kane ka shlem ai jingnang jingstad ka la iai paw na kawei ka snem sha kawei pat. Kum u nongmihkhmat paidbah, u Bah Syiem, u la pynpaw, ba ngim ju da kynmaw ne burom satia ia kita ki nongprat lynti ne kiba la len lade ban pynbha ne kyntiew ia kiba bun ki bynta ha ka jingim katba ki dang ia donlang ryngkat, hynrei bunsien ngi ju klet noh ia kita ki matti kiba la buh ban myntoi da ka pateng ban wan, hynrei ka nuksa ba bha la pyni da kane ka Kolej bad ki nongkitkam ka Ri Bhoi College Students Union kiba la ai nam bad pynkhraw ia ka kyrteng u Principal ba nyngkong kane ka Kolej kaban ai mynsiem shikatdei ia kiba bun ban kynmaw ia ki Matti ba buh da u ne u riew Rangbah ha kaban phriang ia ka jingnang jingstad.
Shuh shuh ruh, nalor ka jingkyntu ia baroh ki nongpeit nongkhmieh ka Ri Bhoi College naduh ki nonghikai, ki nongkitkam bad kiwei kiwei ba kin nang bteng ia ka jingshakri kaba janai ban nang kyntiew ia ka pule ka puthi ban myntoi bad kiew shaphrang ruh ka lawei ki samla pule na kane ka district, u la kular ruh ban iai don bynta lang ha kiba bun ki liang ban kyrshan ia kane ka shlem ai jingnang jingstad kaba rim hapoh Ri Bhoi District. La pynphuh pynphieng ruh ia kane ka jingrakhe ia u mawmer ba 40 ka Ri Bhoi College, lyngba ki jingrwai kiba la kynud lyngba ki sur tynrai.
