Da ka jingkmen bad ka jingsngew burom halor ka jingioh jingithuh kyrpang u Bah Rayonald Kharkamni na ka BCCI, mynta ka sngi ki nongialam ka Synjuk ki Rangbah Shnong Ri Bhoi District ki la pynkup burom ia u da kaba pynkup da ka Jain ryndia ha Circuit House Nongpoh. Lah ban kdew, ba u Bah Rayonald Kharkamni u ba dei u Vice President ka Meghalaya Cricket Association bad ruh u President ka Ri Bhoi District Cricket Association u la shah jied ban long kum u Match Observer ha ka BCCI ha ka jingiakhun ia ka test Kriket ka ri India pyrshah ia ka New Zealand kaban long ha ka 1 tarik Naiwieng ha ka madan ialehkai Kriket ha Mumbai. Ha kane ka sngi, u Bah BB Makdoh, President ka Synjuk ki Rangbah Shnong Ri Bhoi District lem bad kiwei kiwei ki Rangbah Shnong ki la ai ruh ka jingkitbok kitrwiang ia u Bah Rayonald Kharkamni u ba dei ruh u wei na ki dkhot ba pura ka Synjuk.
U Bah Makdoh u la pynpaw ba ka long shisha ka jingsngew sarong ba ka jylla Meghalaya khamtam na Ri Bhoi District kan ioh ia ka jingithuh kaba kyrpang ban shah jied ban long kum u wei na ki dkhot ban pyniaid ne peit pyrman ia ka jingialehkai Kriket kaban long ha ka rynsan International level kane ka dei ka burom kaba khraw ruh ia ka Ri Bhoi District.”Ngi kitbok kitrwiang ia u Bah Kharkamni ba un lah shisha ban pynurlong ia ki kam kumba la bynshet ha u da ka BCCI bad ngi kyrmen ba un nang kiew ha ka kam ban shakri kumno ban kyntiew ia ka kam ialehkai Kriket hapoh ka jylla khamtam ha Ri Bhoi District”, ong u Bah Makdoh.
Na ka liang u Bah Rayonald Kharkamni, haba ai jingkren u la pynpaw ia ka jingsngew kmen ba kum ka Synjuk ki Rangbah Shnong ruh ki don kata ka jingkitkhlieh ban ai mynsiem ia u haba shimti ia kane ka kam kaba khia, ha kaba u la batai ruh ia ki kamram ba kum u Match Observer un hap ban pyndep khamtam ban ai ruh ia ka kaiphod kaba tikna halor kane ka jingiakhun hapdeng ka India bad ka New Zealand.”Ka long shisha ka jingkmen ba ha kane ka kynti ka BCCI ka la phaikhmat sha ka jylla Meghalaya ruh, ban jied ne thung lem ia ki briew na ka jylla ban ioh bynta ban long kum ki dkhot ha kum kine ki rynsan ialehkai kiba heh bad u kyrmen ruh ba ka BCCI kan nang iai phaikhmat sha kane ka jylla ban kyntiew ia ka kam ialehkai Kriket ban myntoi ki khun samla kiba donsap”, ong u Bah Rayonald Kharkamni.
