Khadwei ngut ki Forest Gaurd ba la pyndep ia ka basic training course ki la shah pynkup burom hynnin ka sngi ha ka Convocation ba 28 jong ka Meghalaya Forest Training School (MFTS) ha Williamnagar, East Garo Hills. Haba kren ha ka jingialang u Principal Chief Conservator of Forest (PCCF)bka jylla u H C Chaudhary, IFS ula iaroh ia ki forest guard kiba la trei shitom ban pyndep ia ka training wat hapdeng bun ki jingeh ban pynurlong ia ka jingangnud katkum ki kyndon ban shim ia ka jingkitkhlieh.
Haba pyntip ka tnat khlaw ka dei kawei na ki tnat kaba la pynwan dur ha baroh ar na bynta ki kam pynroi bad ia ki rukom treikam ula ong, ka tnat khlaw la pynhap kum ka tnat saian. Namar kata ki ophisar ka tnat Forest bad Environment ki donkam ban long kiba tbit katkum ka sap ban trei ia ki kam ha baroh ki liang. “Kata kum u nongtrei ban kyntiew ia ka sap na ka jinghikai ba ki ioh na ka training ka long kaba donkam na bynta ka lawei”. Ia ka jaka training ha Darugiri, East Garo Hills District la sdang ha u snem 1994, ka dei kawei ka Institute jong ka MFTS ba pyniaid da ka tnat Forest and Environment ka sorkar jylla, ban ai training 11 bnai ia ki forest guard halor ka Silviculture, Forest Botany, Forest Acts bad Laws and Forest Survey bad kiwei.
Ka skul ka la sdang ia ka jingtreikam na ka jaka ha Baiza hajan Williamnagar naduh 26 tarik Naiwieng 2016. Ha kane ka snem u bah Shambrwell Lakhiat ula wan banyngkong da kaba ioh 88% mark katba u Jacques Wahlang bad u Cedrick Syiem ha ka kyrdan ba-ar bad balai kiba la ioh mar 80% bad 78% mark. Ha kane ka sngi la pynphuh pynphieng ia ka prokram da ka jingrwai bad shad tynrai bad ka March Past da ki khynnah ba la pass training.
