U MLA ka 17th North Shillong u bah Adelbert Nongrum mynta ka sngi ula dawa ba ka sorkar ka dei ban pynkynriah noh mardor ia ki briew ba sah ha Them Iewmawlong khnang ban don ka shongsuk shongshngain bad ban lait na kino kino ki jingkulmar. “Ka sorkar ka dei ban pynkynriah noh mardor ia ki briew na Them Iewmawlong bad kam dei ban shu kular tang da ka ktien hynrei ka dei ban pyni da ki kam,” ong u MLA ka North Shillong u bah Adelbert. U bah Adelbert ula kren ia kane, hadien ba ha kine ki khyndiat sngi ka la mih ka jingiakulmar ha dukan Saw Aiom kaba don ha Basa Sohsaw, Iewduh ha kaba ki don katto katne ngut ki khar Punjabi kiba thmu ban bam bad dih ei ha katei ka dukan.
U la ong ba watla kane ka jingjia ka dei ka jingjia kaba rit hynrei kiei kiei ki jingjia bakhraw ki shong ha ki jingjia kiba rit. U bah Adelbert ula ong ba ka jingthmu jong ki nongshong wai ha them Iewmawlong ka dei ba ki thmu ban pynmih biang ia ka jingkulmar kumba la jia ha ki por ba mynshwa. “Kine ki nongshong shnong ha Them Iewmawlong , ki thmu ban bam ei bad ki thmu ban pynibor bad ban leh donbor ha kane ka jaka,” ong u bah Adelbert.
Ha kajuh ka por u la takrain ia ka sorkar MDA namar ba kam shim khia bad ka leh sting ban pynkynriah ia kine ki nongshongwai na Them Iewmawlong sha kawei pat ka jaka kaba ki la pynkhreh.“Ka sorkar ba ialam da ka NPP kadei ka sorkar kaba tlot ka bym larkam bad ka la pheil ha baroh ki liang namar ba la san snem ka iakhun ia kane ka ishu hynrei haduh mynta kam shym la lah ban weng ia ki na Them Iewmawlong,” ong u MLA ka North Shillong. Ula kyntu ia ka tnad pulit ba kadei ban pyntikna ba ka ain kadei ban long kumjuh ym ban leh shilliang khmat ia kano kano ka jaidbynriew.
