U Myntri Rangbah ka jylla, u Conrad K Sangma mynta ka sngi ula pyllait paidbah ia ka prokram CM Farm Plus ka program ban peit kyrpang ban kyntiew ia ka kam rep kam riang ha ka jylla bad ka jingioh jong ki paidbah nongrep ka thain bad ka jylla baroh kawei. Ha kane ka sngi la wan ban iadon ryngkat da ka Kong Ampareen Lyngdoh, Myntri ba dei khmih ia ka tnad Agriculture ka jylla, u Bah Mayralborn Syiem, MLA ka Nongpoh, u Abhilash Baranwal, Deputy Commissioner ka Ri Bhoi, u Jagpal Singh Dhanoa, Superintendent of Police ka Ri Bhoi lem bad kiwei de ki ophisar bad ki paidbah nongrep ka District. Lyngba kane ka prokram kaba la pynlong ha Parish Hall Nongpoh, u Conrad K Sangma u la ioh ruh ban sam ia ki symbai jong u Large Cardamon sha ki paidbah nongrep ka District kum shi bynta ban pynshlur ia ki nongrep ban rep ia ki jaid musli musla kiba rem dor bad kiba lah ban kyntiew khambha ia ka ioh ka kot jong ki nongrep. Haba kren naka liang u myntri rangbah ka jylla, Conrad Sangma u ïathuh ba kum ka sorkar ka don ïaka thong bad ka jingthmu ban iohi ba ngi lah ban kyntiew ia ka ioh ka kot jong ki nongrep, ban pynpoi ïaki ladngi lynti kiba kham bun na ka bynta jong ki nongrep bad ban pynbha ruh ïa ka rukom treikam baroh kawei ha kaba ki nongrep kin lah ban pynkiew ia ka jingpynmih jong ki ne ïoh ïa ka dor kaba kham bha na ka bynta ka jing pynkiew dor ia kaei kaei kaba ki pynmih. U la ïathuh ruh, ba ha kum kane ka jingpyrkhat ha kine ki hynriew snem ba la leit noh ka sorkar jong ka la leh ban wan rah ia ki prokram bapher bapher hapoh ka jylla Meghalaya na ka bynta ki nongrep, na ka bynta ka jingtei jong ngi ia ki kynhun ba kyrpang bad na ka bynta ki khun samla jong ngi lane ki nongseng kam seng kam seng jam.
Shuh shuh u la ïathuh ba mynta ka sorkar ka don sa kawei pat ka sienjam ban wan rah sa kawei pat ka prokram ka ban kyrshan bad iarap shuh shuh ia ki nongrep jong ngi ka ban kot shaduh ka 70 percent tam ki nongrep naka jing bun briew jong ka jylla Meghalaya bad u la ong ba lada ngi kwah ban iarap ia ki paidbah jong ka jylla jong ngi, ngi dei ban kyrshan ban kyntiew ia ka rep ka riang bad ki nongrep hapoh ka jylla jong ngi. U myntri Rangbah ka jylla u la ïathuh ruh, ha kine ki hynriew snem ba la dep palat 1,50,000 tylli ki longiing ki la ioh jingmyntoi lyngba ki prokram bapher bapher jong ka sorkar kaba la lam khmat daka NPP, la ka dei lyngba ki mission program kiba ka sorkar ka la wan rah kum ka Turmeric mission, Ginger mission, Floriculture mission, Mushroom mission, Spice mission lane kiwei kiwei de bad Kine ki mission baroh ki la iarap bun bun hajar ia ki long iing bad ki nongrep jong ka jylla Meghalaya. U Myntri Rangbah u la ong ruh ba kane ka program lane ka CM Farm Plus ka long tang kawei pat ka sienjam ban iarap ban pynïoh ïaki symbai ki ba bha haka por kaba biang. Kumba ka Cognitive ka la kdew ha phi ba lyngba kane ka prokram ngi la sngewthuh ba ki nongrep jong ngi kin lah ban ioh ia ki symbai, ia ka jingbha jong ki symbai bad ha ka por kaba biang jong ki symbai khnang ba kin lah ban pynbun shisha ia ka jingmih jong ki.
U la pynpaw ruh ba ha kawei naki program CM Connect, ki paidbah ki batai bad iathuh ia nga shaphang ki jingeh jong ki bad la don arngut ki Longkmie kiba la kdew shaphang ka jingbym ioh ia ki symbai. Kumta kane ka prokram kyrpang ka long ban iarap ia ki nongrep jong ngi ban ioh ia ki symbai ha ka por kaba biang bad ban ioh ia ka jingbha kaba ki donkam. U myntri Rangbah ka jylla u la ïathuh ruh ba ka sorkar kan peit ia ka jingpynmih kaba jrong khnang ba ha ki snem kiba bud, wat hadien ba kane ka prokram ka la kut ne ka la jah, ki nongrep kin dang ioh ia ka jingmyntoi na kane ka prokram, Kumta lyngba kane, Ngi khmih lynti ban pynlut kumba 300 klur ban sam ia kine ki symbai bad ki jingmih kin kynthup ia U Black pepper, cinnamon, cashew, pineapple, coffee and cocoa bad kiwei kiwei. Kumta kine ki mar kin long ki symbai kiba yn ai sha ki nongrep katba ki kwah. Ka sorkar ka dang thmu ban leh ia kane ka prokram haki shnong bapher bapher, Kumta ban ia kaba sam sha ki 11 ngut ki nongrep ha ki shnong bapher bapher ka sorkar kan shim ia baroh kawei ka shnong kaba pura ban sam ïaki symbai khnang ba baroh kin long shi bynta jong ka jingtreikam lang bad baroh ki lah ban iarap iwei ia iwei pat bad baroh ki nongrep kin iadon bynta ha kaba rep ia uta u mar rep ba kyrpang. U la ong ruh ba kane ka dei ka prokram kaba kyrpang bha bad kumba la ong, ka prokram kaba thmu ban pyndap ia kata ka jingduna na ka jingeh ban ioh ïaki symbai bad ka jingdon jong ki symbai.
Hadien katei ka program u Myntri Rangbah ka jylla u la leit ruh ban kynduh bad ban ai mynsiem ïaki samla kiba la shah hikai ban seng kam lajong bad ban ieng hala ki jong ki kjat ha kawei ka jaka ai jinghikai kaba la tip kum ka Greta Solutions Training Academy kaba la bei pisa da ka sorkar lyngba ka Meghalaya State Skill Development Society (MSSDS) kaba don haka shnong Mawdiangum. Naka liang kitei ki samla kiba don kumba 65 ngut kila ioh ruh ban kren markhmat bad u Myntri Rangbah ka jylla ha kaba ki la ïoh ban pynpaw ïaka jingeh bad ka jingsngew jong ki haka jingïaid lynti jong katei ka prokram ai jinghikai ha kaba kila pynpaw ba kane ka dei ka kabu ïaki ba kin lah ban ieng hala ki jong ki kjat. U Rangbah Shnong ka Pyrdiwah u Bah Ambrose Khonglah ula ong ba ka shnong ka iatrei ryngkat bad ki shipai BSF na ka bynta ban iada ia ki nongshong shnong ban ym ailad ba ki nong Bangladesh kin ioh ban wan rungtuh. Ula ong ruh ba lada jia pat ba ki jaidbynriew Khasi kiba sah ha ri Bangladesh ki wan pan jingiarap ban rung shapoh ka ri India kumta kin iarap ia ki da kaba iatreilang bad ki shipai BSF. Ki nongshong shnong kila pynpaw ruh ba ka jingpynjari ia ka korphiw miet da ka sorkar jylla kala long ka jingmyntoi na ka bynta ban ioh tehlakam ia kino kino ki nong Bangladesh kiba thmu ban wan rungtuh shapoh ka jylla.
