Ka Raj Bhavan Shillong ka la pynlong ia ki prokram bapher bapher hynne ka sngi kum shibynta ka jingrakhe ia ka lyngkhuh sngikha u Mahatma Gandhi bad ka Swachhata Hi Seva. Ha kane ka sngi, ka Raj Bhavan ka la dap da ka jingwan tuid ki paidbah naduh ka por 5 baje mynstep haba ki nongmareh ha ki rta bapher bapher ki la wan iashim bynta ha ka 5.5 km Swachhata Run hapoh jong ka Swachhata Hi Seva ban rakhe ia ka lyngkhuh sngikha u Mahatma Gandhi. Palat 1500 ngut kila wan iashim bynta ha ka Swachhata Run kaba la pynlong da ka Raj Bhavan bad ka Central Bureau of Communication (CBC) Shillong ryngkat ka jingiatreilang bad ka District Sports Office, East Khasi Hills bad ia kane ka jingiakob la sdang na Raj Bhavan ha kaba u Lat ka jylla u C.H. Vijayashankar ula kaweh ia ka lama. Ha ka Open Category (Men) u Bah Daniel L Walang ula wan nyngkong, baar u Nahtei Wangnao bad u Dasaman Khyndait ula wan balai, katba ha ka Open Category (Women) ka Marqueenless Ramsiej kala wan nyngkong, baar ka kong Phyrnai Khyndait bad ka kong Dapliss Wahlang kala wan balai. U bah Daniel L Wahlang ula shim por 17.15 minit ban pyndep ia ka jingmareh katba ka kong Marqueenless Ramsiej kala pyndep ia ka jingmareh ha ka 22.25 minit bad la sam ruh ia ki khusnam sha kito ki nongmareh kynthei bad shynrang kiba la palat ia ka 50 snem ka rta.
Haba kynmaw burom ia ki nongtei bad nongsaindur iaka ri u Mahatma Gandhi bad u Lal Bahadur Shastri, u Lat ka jylla ula ong ba ngi la ioh mynsiem ban pynurlong ia ka jingangnud jong ka ri India kumba la iohi jngai da u Mahatma Gandhiji bad kiwei pat ki nongialam ba pawkhmat ka ri bad ula pynpaw ia ka jingsngewtynnad ban iohi ba bun ngut ki paidbah ka jylla Meghalaya kiba wan jngoh iaka Raj Bhavan ha katei ka sngi bad ula ong, ba yn iai pynlong ia kum kine ki prokram kiba ai jingmyntoi ia ki paidbah. Ka Editor jongka Shillong Times, ka Kong Patricia Mukhim kala iaroh ia ka jingshimkhia jongka Raj Bhavan ban pynlong ia ka program ban rakhe ia ka Swachhata Hi Seva bad Gandhi Jayanti bad kala banjur ia ka jingkongsna ban long kiba lehkhuid man la ka sngi kum ka kolshor bad kala pynshlur ban don iaka rukom treikam ban lam sha ka Swachhata kum ka bynta kaba kongsna ha ka jingim kaba man la ka sngi. Hadien ka Swachhata Run la pynlong iaka jingthung dieng hapoh jong ka Ek Ped Maa Ke Naam, ha kaba u Lat ka jylla ula thung ia u dieng ha Ward’s Lake bad ha Raj Bhavan, katba ha ka jingrakhe iaka Gandhi Jayanti ha ka Durbar Hall, u Lat ula leit buh syntiew ban kynmaw burom ia u Mahatma Gandhi bad ia u Lal Bahadur Shastri ha kansgikha ka jongki.
U Lat ula aiti ruh ia ka cheque mar T.1, 11,000 sha ki 4 tylli ki Gandhi Kendras ba kynthup ia ka Laitkroh Kasturba Gram Seva Kendra, Tuber Kasturba Gram Seva Kendra, Jambal Kasturba Gram Seva Kendra bad Magupara Kasturba Gram Seva Kendra bad ula sam ia ki khusnam sha ki nongjop ha ka Essay Writing bad Art Competitions kaba la pynlong da ka CBC Shillong, National Book Trust of India (NBT) bad ka District Education Office, halor ka phang Swachhata bad Poshan na ka bynta ki khynnah skul jongka East Khasi Hills. U Lat ula pyllait ruh ia ka Mobile Library jong ka National Book Trust na ka phyllaw jong ka Raj Bhavan, katba ka National Institute of Fashion Technology (NIFT) Shillong bad ka Tnad Sericulture ki la pyninam ia ki jingthain da ki kti bad ia ki tiar thain bad ia ki jain Khadi ha kane ka sngi.
