Ka ophis jong ka district horticulture officer, West Jaiñtia Hills District hynne ka sngi kala pynlong iaka iew pyni nam naka bynta ki nongrep ha Community Hall Ladthadlaboh Jowai, bad lyngba kum kane ka iew ka jingthmu jingangnud hi ka long ban kyntiew shuh shuh iaka kam rep kam riang namar daka jingioh lad iakynduhlang ki nongrep ha kum kane ka rynsan kin ioh ia ai jingmut iwei ia iwei pat, nalor ba kin ioh iaki jinghikai bapher bapher lyngba ki tnat sorkar haba iadei bad ka kam rep kam riang. Ia kane ka iew pyni nam la tip kum ka Horti Fair Cum Exhibition kaba hap hapoh ka MIDH scheme 2023-2024 bad la wan ban shim bynta daki nongrep naki shnong bapher bapher, ha ryngkat ka jingdonlang u Deputy Commissioner ka West Jaiñtia Hills District, u B. S Sohliya kum u kongsan, I kong D.C Sohtun, Director of Horticulture, Meghalaya, Shillong kum i symbud kongsan.
U Deputy Commissioner ha kane ka sngi ula ai mynsiem iaki nongrep ba kin shim kabu ia kum kane ka lad bala wanrah kyrpang naka bynta ka jingmyntoi jong ki hi.Bad ruh u iaroh iaka tnat Horticulture kaba la pynlong manla u snem kum kane ka rynsan pyni nam khnang ba ki nongrep kin lah pynmih khambha shuh shuh iaki mar rep. Nangta ban teh la kam halor ka jingpyndonkam bakla da kiwei iaka nam u shynrai Lakadong, u DC B.S Sohliya u ong ba naka liang ki bor district ryngkat ka tnat horticulture kin sa tohkit bniah bha halor kane bad ban leh ia kaba donkam khnang ban lah pynneh pynsah iaka nam u shynrai bala pynmih na ka thaiñ jaiñtia.
I kong D . C Sohtun, Director of Horticulture, Meghalaya, Shillong haba kren kyntu kynpham iaki nongrep kala iathuh ruh shapang ki jingmyntoi ba ki paidbah ki lah ban ioh lyngba kane ka MIDH scheme. La ioh ruh ka jingkren na u S. Rani, District Horticulture officer, Jowai, u R.Lamare Assistant Director of Horticulture West Jaiñtia Hills District, na u Demandson Lyngdoh, Assistant Director of Horticulture (Mkt), Jowai, na u M.Timung Chairman Lakadong Turmeric Cooperative Union Ltd Jaiñtia Hills, na u A.B.M Shullai waheh shnong Ladthadlaboh, ki nongrep bad kiwei.
