Pynlong prokram baar sngi ka sorkar bad ATNF

Ka sorkar jylla bad ka Apollo Telemedicine Networking Foundation (ATNF) kala pynlong ia ka Meghalaya Cancer Conclave 2024, kaba ar sngi, halor ka phang “Close the Care Gap” ha Courtyard Marriott Shillong. Ia kane ka Conclave la pyniaid da ka Myntri ka koit ka khiah ka Kong Ampareen Lyngdoh, ha kaba la wan ban iashimbynta lang da ki Oncologists, Cancer Researchers, Scholars, ki seng trei mon sngewbha, ki heh ophisar bad ki nongmihkhmat na ki lad pathai khubor bad ka jingthmu ban iatai halor ki jingeh bad ban wanrah ia ki buit treikam ban weng ia ki jingeh halor ka jingsumar ia kiba pang Cancer ne Bampong. U Principal Secretary ka Koit ka Khiah u Sampath Kumar ula ong, ka jingthmu jong ka Meghalaya Cancer Conclave, ka long ban thaw ia ki lad ki lynti kaban long kyllum ha kaba iadei bad ka jingai jingsumar ia kiba pang Cancer, da kaba trei shitom, ban iasam ia ki jingtip bad ban saindur ia ka jingiatehlok bad ula pynpaw ia ka jingkhmih lynti ba kane kan ym dei eh tang ka jingiakren hynrei yn wanrah ruh ia ka jingkylla ha ka jingai jingsumar ia kiba pang Cancer ha ka jylla.

Na ka liang u Chief Business Officer ka Apollo Telemedicine Networking Foundation Prem Anand, ula pynpaw ba ka long kaba kongsan ban don ia ka jingiatreilang ban iakhun pyrshah ia ka Cancer. Ula ong ban iakhun pyrshah ia ka jingpang Cancer ka long kaba kongsan bha ban don ia ka jingiatreilang bad ka jingiatylli, kumta ka ATNF ka sngewsarong ban iatreilang bad ka sorkar Meghalaya ha kaba kin iatreilang ban kin iaid lang ym tang ban shimkhia ia ki jingeh hynrei ban prat lynti ruh na ka bynta ka lawei ban ym don kiban shah ieh shadien ha ka jingiakhun ia ka jingpang Cancer.

Ha katei ka jingialang, ki riewstad bad ki riewshemphang kila iatai sani halor ka jinglap dang kloi ia ka jingpang, ban ai ka jingsumar kaba paka, ka jinglong jingman jong kane ka jingpang ha ka jylla, ban pyndonkam ia ki kor teknoloji ha kaban khmih bniah, ka jingai jingkyrshan bad ka jingai jingsumar, ban wad bniah ia ka jingpang Cancer bad kumta ter ter.