Pynlong prokram ka NEIGRIHMS ban ai jingsumar khmat katkum ki kor thymmai

Ka Tnad Ophthalmology jong ka North Eastern Indira Gandhi Regional Institute of Health and Medical Sciences (NEIGRIHMS), ka la pynlong ia ka Continuing Medical Education (CME) Prokram halor ka phang “Updates in Ophthalmology” ha kaba ki Doctor khmat na kylleng ka nongbah Shillong ki la wan ban iashim bynta. Ia katei ka prokram la plie da u Prof (Dr.) Nalin Mehta u Director ka NEIGRIHMS, ha kaba la donlang u Khliehduh ka Tnad Ophthalmology ka NEIGRIHMS Prof. (Dr.) Tanie Natung, ki doctor khmat ka nongbah Shillong bad ki samla pule Ophthalmology jong ka NEIGRIHMS.

Ki doctor khmat kiba la iashim bynta ha ka prokram ki la batai bad sam ia ki jingtip halor ka rukom sumar khmat bad khamtam ban pyndonkam ia ki kor ki bor ba thymmai ha ka kam ai jingsumar katkum ka jingdawa ka por, katba ki samla pule ki la pynpaw ia la ki kam Reasearch bad pynsngew ia ka jinglap bad ka jingshem jong ki ha kaba ia dei bad ka Ophthalmology.  

U Director ka NEIGRIHMS u Prof. Mehta ula ai iaroh ia ka Department Ophthalmology kaba la pynlong ia kane ka prokram bad ula ban jur ia ka jingdonkam ban iai bteng ban pule ban ioh ia ki jingtip ba bniah bad ula pynshlur ia ki Doctor khmat ba ki dei ban iashim bynta ha kum kine ki jait prokram ba kin ioh ia ki jingtip ba bniah khamtam eh ia ka jingpyndonkam ia ki kor ki bor ba thymmai katkum kane ka juk stad mynta.