Ka District Rural Development Agency (DRDA) ha ryngkat ka jingiatreilang bad ka Rashtriya Gram Swaraj Abhiyan (RGSA) bad ka SRES District Implementing Agency mynta ka sngi ka la pynlong ia ka jingïalang kaba kongsan lane ka “One Day Workshop” halor ka phang pdeng ban kyntiew ia ka roi ka par jong ka Ri Bhoi bad ka bynta bad ka jingkitkhlieh jong ki khlieh Nongshynshar Shnong ia kaba la ioh ban pynlong ha Circuit House ha Nongpoh. Ia kane ka prokram la pynlong kyrpang daka jingthmu ban kyntiew ia ki sap jong ki Khlieh Shynshar Shnong na ka bynta ka roi ka par ba pura jong ka Ri Bhoi, da kaba pynthikna ia ka jing ia treikam kaba ia dei rukom bad ki buit pynroi jong ka jylla bad ka ri. La wan ia shimbynta ha kane ka program da ki heh Ophisar jong ka District kiba kynthup ia u Abhilash Baranwal u Deputy Commissioner ka Ri Bhoi, u S.C. Sadhu, Mission Director jong ka SRES Shillong bad u Raja Brahma u Projek Director jong ka DRDA Ri Bhoi hakaba la ia wan ban ia shimbynta ha katei ka workshop kaba shi sngi sa ki Nongialam bad Nongshynshar Shnong na kylleng ka Ri Bhoi District.
Ha kane ka jingïalang la don ki jingkren jingkren da u Iaraphunlin Diengdoh, JMD ka SRES Shillong bad ka Lizelda Dkhar, Faculty Member ka SIRD Nongsder, kiba la batai bniah ïa ka jingpyntreikam bad ka jingktah jong ki prokram ba kongsan kum ka Mahatma Gandhi National Rural Employment Guarantee Scheme (MGNREGS) bad ka Pradhans Mantri Awas Yojana-Gramin (PMAY-G). U S.C. Sadhu haba ai jingkren ha katei ka jingialang, u la batai ia ka bynta kaba kongsan jong ki Nongialam Shnong ha kaba pyntreikam hok ia ki skim sorkar bad ka jing nang kiew shaphrang jong ka jylla baroh kawei. U S.C Sadhu u la pynpaw ba ngi donkam ban ioh ia ka jingiatreilang jong ki Nongialam bapher bapher khamtam naki nongialam shnong, khamtam ha kaba pynsuk ia ka jingai jaka na ka bynta ki kam pynroi bad u la ban jur ia ka jingdonkam ban pynthikna ba baroh ki nongioh jingmyntoi kiba dei hok ba kin shah kynthup lang hapoh ka skim PMAY-G.
Haba kren ha katei ka jingialang naka liang u Deputy Commissioner ka Ri Bhoi Dsitrict, u la ai iaka jingiaroh iaka sorkar halor ka jingpynpoi hok iaki skim sha ki shnong bapher bapher khamtam hakaba ia dei bad ka Skim Mahatma Gandhi National Rural Employment Guarantee Scheme (MGNREGS) bad ka Pradhans Mantri Awas Yojana-Gramin (PMAY-G). U Deputy Commissioner ka Ri Bhoi, u la pynpaw ruh ba hapoh ka jylla Meghalaya ban pyntreikam iaki skim bapher bapher kan nym urlong lada ngim ioh iaka jingiatreilang naki Rangbah Shnong bad ki Nongkitkam jong ki Shnong bad lyngba ka jingiasnohkti lang da ki Rangbah Shnong kan pynsuk ha ka ban pyntyllun iaki Skim bapher bapher.
U la kyntu ia baroh ki nongialam shnong kiba la poi ha katei ka jngialang ba kin shim kabu lyngba ka jingwan ban pynlong ia katei ka Workshop kaba shi sngi bad ha kajuh kapor u la kyntu ruh iaki shnong bad iaki Rangbah Shnong ba kin shim kabu ruh iaka kane ka skim MGNREGA kaba dei kawei naki skim kaba lah ban kyntiew iaki kam pynroi hapoh ka shnong ka thaw bad lyngba kane ka skim ka lah ruh ban ai kam ai jam iaki ba bun ki longiing kiba kwah ban trei haka.
