U Myntri Rangbah ka jylla u Conrad K Sangma ula ong, ba ka sorkar jylla ka la thung 99 lak tam ki tynrai dieng ha ka jylla naduh u snem 2020-24. Haba jubab ia ka jingkylli ba la wanrah da u MLA ka VPP na Maryngkneng u bah Heavingstone Kharpran, u Myntri Rangbah ula iathuh ba ha kine ki saw snem ba la dep ka sorkar ka la thung 99,78,352 tylli ki tynrai dieng bad na kine 23,76,735 tylli ki dieng ba im bad 26 lak ki la iap noh. U Myntri Rangbah ula pyntip ba la thung 26 lak tam ki tynrai dieng da ka Forest, 32 lak tam da ka Soil bad Water Conservation bad 48 lak tam la thung da ka MBDA, MBMA. U la bynrap ki daw ba pynlong ia ki dieng ban iap noh ka lah ban dei na ki jait symbai, ka jinglong ka jaka, ka jinglong ka khyndew ka bym sboh, ka jingthang khlaw.
U Conrad u la ong ba ka jingpyllut ka long kumba T. 100 klur ha kine ki saw snem ba la dep bad ka jingheh ka jaka ba thung dieng ka long 1.9 lak ki tynrai dieng ha ka shi hectare. U la ong ba ki don bun ki daw ba ki tynrai dieng ki iap noh bad ka jingim 70-75 percent kam dei kaba sniew. U la bynrap ka sorkar haba ka thung dieng, ka pynthikna ban don ka jingiatreilang bad ki paidbah ka shnong khnang ban pyllong ka jingthung dieng kaba jop.
Ka don ruh ka jingsumar ia kine ki dieng kiba thung ha ki jaka bapher bapher watla kam dei kaba tista. Ha kajuh ka por, ula ong ba ka Climate Council ka thmu ban sumar ia ka mariang, ban iada ia ka khlaw, ia ka khyndew, ka um ka wah, lyngba ka prokram bapher bapher na ki tnad sorkar kum ka NREGS, bad kiwei.
