Ka BJP Meghalaya mynta ka sngi ka la ia lumlang ha khmat ka ophis ka party ban pynrem jur halor ka jingkren jong uwei u nongialam ka Congress u Sam Pitroda uba la pyniasyriem ia ki briew ka thain Lammihngi bad ki China. Haba kren sha ki lad pathai khubor, u nongaiktien ka BJP u bah Mariahom Kharkrang u la ong ba kane ka jingkren jong u nongialam ka Congress ka la ktah ia ka jingsngew jong ki paidbah nong India khamatm ki paidbah ka thain Lammihngi.
“Sngew lynngoh ba u briew uba la nang la stad uba la shemphang, hynrei u dang kren ia kane ka ktien kaba la pynmong bad ktah ia ka jingsngew jong ki paidbah ka Lammihngi. Kane ka long ruh kum ban wanrah ia ka jingsngewpher jaidbynriew,” ong u nongaiktien ka BJP Meghalaya.
Halor ka jingkam ka Congress ba ka jingkren jong u Pitroda kadei tang ka jingkren shimet, u bah Kharkrang u la ong kaei kaei kaba u kren ym lah ban shim ba dei tang ka jingsngew shimet, hynrei kadei ka kamram ka Congress ba kan pynshai ia kane. Ha kajuh ka por, u la ong ba na ka liang ka party kan sa phah jingthoh sha ka party kmie kaba ialam ha Delhi ban pyntip ba ki la pynlong ia ka jingiakhih.
