Pynrem u bah Hek ba shah pyniap u nongbylla bar jylla

U MLA ka BJP na Pynthorumkhrah uba dei ruh u Myntri ha ka Sorkar, u Bah Alexander Laloo Hek ula pynrem jur ia ki runar kiba donkti ban pyniap ia u nongbylla bar jylla uba sah ha Nongmensong. U bah Hek ula ong ba ka sorkar ka dei ban pynshitom da kaba tyngeh ia ki briew kiba donkti ban pyniap ia u nongbylla bar jylla.

Halor kane ka jingjia, u bah Hek un thoh sha u Myntri ka tnad kam Pohiing ka sorkar pdeng u Amit Shah ban leh eiei na bynta ban tehlakam ia kum kine ki jingleh riewkhlaw ha kane ka jylla. “Kum kine ki jingleh riewkhlaw ym dei ban ailad, bad kino kino kiba donkti ki dei ban shah pynshitom katkum ka ain,” ong u bah Hek.

U bah Hek ula ong ruh ba kane ka jingleh riewkhlaw kam dei kaba dang mynta, hynrei ka dei kaba la iai jia naduh mynshwa kaba kylla long ka jinglehrain ia ka jylla. “Ka jingleh jong katto katne ngut ki briew kan pynbudnam syndon baroh ki nongshong shnong ka jylla, haduh ba ki briew na kiwei ki jylla kin khein ba kiba sah ha Meghalaya ki dei ki riewkhlaw bam doh briew,” u la ong.