Ban wanrah ka jingtip jingshem phang ha ki bynta bapher bapher ia ki misteri ka shnong Sohmynting, West Jaiñtia Hills District, kiba la pyndep ia ka jingshah hikai lyngba ka Skill Meghalaya. Ha ka 16/09/2024, ka seng All Jaiñtia Muster Roll Workers & Labour Union, ryngkat ka jingiatreilang ka tnat Labour, ka Skill Meghalaya bad ka Meghalaya AIDS Control Society ki la hiar sha Sohmynting ban pynsngewthuh halor ka jingdonkam ban shim kabu ia ki lad jingiarap ba ioh lyngba ka sorkar kum na ka tnat Labour, na ka Skill Meghalaya bad kumjuh ruh ban pynsngewthuh sha ki halor ka jingpang HIV/AIDS. Ha ka jingialang ba pyniaid da u Jerry Suting, la donlang u Lambor Suchen Skill Development Officer, West Jaiñtia, U Baraplang Sohklet inspector ka tnat Labour Department West Jaiñtia, u Khroo L Pariat adviser ka All Jaintia Muster Roll Workers and Labour Union, U Ajoy Lanong Deputy Director, Meghalaya AIDS Control Society, Ka Daiowanphi Iakai President ka All Jaintia Muster Roll Workers and Labour Union, U Sanjoy Shylla, Centre Head ka Greta Solution Training Academy, Jowai, bad kiwei. U Ajoy Lanong haba pynshai halor u khñiang jingpang HIV/AIDS, ula ong ba hapoh ka jylla Meghalaya don haduh 9300 tam kiba ioh khniang HIV, bad ula pynshai ruh kumno une u khñiang jingpang u pur na uwei u briew sha uwei pat.
U Baraplang Sohklet Inspector Labour ula pynshai ka jingiadei bad ka Meghalaya Building and Other Construction Workers Welfare Board kaba dei ka board ba peit ia ka bha ka miat ki nongtrei mistiri. Kumta ula kyntu ia ki ban pynrung kyrteng ne long dkhot ha kane ka board, namar lah ban ioh jingmyntoi lyngba ka scholarship na ka bynta ki khun naduh class 1 haduh degree lane deploma. Don ruh ka pension ba 1000 tyngka ia kiba la palat 60 snem ka rta, bad kumjuh ka jingioh iarap ba 2 lak tyngka lada jia ba khlad shiteng por ki dkhot. U Lambor Suchen Skill Development Officer, ula pynsngew ia ki Skil bapher bapher ba la wanrah ka sorkar na ka bynta ki khun samla ka Jylla ba kin ioh lad pynjanai ia ka sap ba ki don, khnang ba kin lah ban sdang ia ka kam.
U Khroo L.Pariat Advicer ka seiñ All Jaiñtia Muster Roll Workers & Labour Union, u ong baroh kiba la pyndep shah hikai na ka Skill Meghalaya ki long ka nuksa ia kiba bun, ha kajuh ka por u kyntu ia ki misteri ban leit pynjanai ia ka sap lyngba ka Skill Meghalaya khnang ban ioh certificate nalor ban pynrung dkhot ia lade hapoh ka tnat Labour.
